ایجنسیاں
سرینگر؍۲۳ جولائی
جموں و کشمیر میں حالیہ موسلا دھار بارشوں کے باعث آنے والے اچانک سیلاب اور لینڈ سلائیڈنگ کے واقعات میں جاں بحق ہونے والوں کی تعداد جمعرات کو۲۹ ہو گئی، جب ضلع پونچھ سے۲۵ سالہ خاتون کی لاش برآمد کی گئی۔
حکام کے مطابق مرہ گاؤں کی رہائشی خالدہ کوثر، زوجہ یاسر اقبال، کی لاش سرنکوٹ میں فضل آباد فٹ برج کے قریب تلاشی کارروائی کے دوران برآمد ہوئی۔ وہ۱۸ جولائی کی رات علاقے میں آنے والے تباہ کن اچانک سیلاب میں بہہ گئی تھیں۔
انہوں نے بتایا کہ لاش کو سرنکوٹ کے سب ڈسٹرکٹ اسپتال منتقل کیا گیا، جہاں گاؤں کے لمبردار ذاکر حسین نے اس کی شناخت کی۔ قانونی کارروائی مکمل کرنے کے بعد لاش آخری رسومات کی ادائیگی کے لیے اہل خانہ کے حوالے کر دی گئی۔
تازہ لاش کی برآمدگی کے ساتھ ہی ضلع پونچھ میں ہلاک ہونے والوں کی تعداد۱۷ ہو گئی ہے، جو متاثرہ اضلاع میں سب سے زیادہ ہے، جبکہ پورے جموں خطے میں بارش سے متعلق مختلف حادثات میں اب تک۲۶؍ افراد جان کی بازی ہار چکے ہیں۔
سرکاری اعداد و شمار کے مطابق جموں و کشمیر بھر میں بارشوں سے متعلق مختلف واقعات میں مجموعی طور پر۲۹؍ افراد ہلاک ہوئے ہیں، جن میں کشمیر وادی کے ضلع بانڈی پورہ میں دو اور ضلع بڈگام میں ایک شخص کی موت شامل ہے۔
۱۸جولائی کی رات مرہ بستی میں آنے والے اچانک سیلاب میں جاں بحق ہونے والوں میں۵۹ سالہ نور صفیہ زوجہ محمد لطیف، ان کے۱۶ سالہ بیٹے سجاد احمد‘۱۱ سالہ حق نواز احمد،۱۱ سالہ شہنواز احمد‘۲۵ سالہ خالدہ کوثر زوجہ یاسر اقبال، ان کا دو سالہ بیٹا صوفیان‘۶۰ سالہ بانو بی زوجہ محمد حسین اور۷ سالہ محمد اکرم ولد محمد لیاقت سمیت دیگر اہل خانہ شامل ہیں۔
حکام نے بتایا کہ تلاشی کارروائیاں بدستور جاری ہیں کیونکہ اب بھی چھ افراد لاپتہ ہیں۔
