ایجنسیز
جموں؍۱۱مارچ
راجوری کے نوشہرہ سیکٹر میں فوج نے دوسرے روز بھی بڑے پیمانے پر تلاشی آپریشن جاری رکھا ہے۔ گزشتہ روز لائن آف کنٹرول کے قریب دراندازی کی ایک کوشش کو ناکام بناتے ہوئے فوج نے ایک درانداز کو ہلاک کرنے کا دعویٰ کیا تھا، تاہم اس کا ایک ساتھی موقع کا فائدہ اٹھا کر گھنے جنگلات کی آڑ میں فرار ہونے میں کامیاب ہوگیا۔
اسی مفرور دہشت گرد کی تلاش میں آج بھی پورا علاقہ سیکورٹی فورسز کی نگرانی میں ہے اور آپریشن کو مزید وسعت دی گئی ہے۔
فوجی حکام کے مطابق دراندازی کا یہ واقعہ نوشہرہ کے جھنگڑ علاقے میں پیش آیا تھا جہاں خفیہ اطلاع ملنے کے بعد الرٹ دستوں نے مشتبہ نقل و حرکت کا سراغ لگا کر بروقت کارروائی کی۔
جھڑپ کے دوران ایک دہشت گرد مارا گیا، تاہم دوسرا اندھیرے اور دشوار گزار زمین کا فائدہ اٹھا کر فرار ہوگیا۔ فوج کا کہنا ہے کہ فرار شدہ دہشت گرد شدید سرد موسم، پتھریلے ڈھلانوں اور جنگلات کے درمیان کہیں چھپا ہوا ہے، اور اسے پکڑنے کے لیے زمینی اور فضائی نگرانی مزید سخت کر دی گئی ہے۔
ذرائع نے بتایا کہ فوج اور دیگر سیکورٹی اداروں نے پورے جھنگڑ، کلال، نولا اور گردونواح کے پہاڑی سلسلوں میں سرچ آپریشن کو پھیلا دیا ہے۔ علاقے میں گھنے جنگلات، کھڑی ڈھلانیں اور متعدد خالی ڈھانچے موجود ہیں، جن کی ایک ایک جگہ جدید آلات، ڈرون اور ہیٹ سینسر کی مدد سے کھنگالی جا رہی ہے۔ فوجی ذرائع کا کہنا ہے کہ دہشت گرد کو زیادہ دیر تک چھپے رہنے کا موقع نہیں ملے گا کیونکہ تمام فرار راستوں کی کڑی نگرانی کی جا رہی ہے۔
فوجی ذرائع نے بتایا کہ ہلاک شدہ دہشت گرد کی شناخت حمزہ یوسف کے نام سے ہوئی ہے، جو پاکستان کے زیرِ قبضہ کشمیر کا رہائشی تھا۔ خفیہ دستاویزات اور دیگر مواد کی بنیاد پر یہ بھی واضح ہوا ہے کہ حمزہ یوسف لشکر طیبہ کے اُس لانچنگ نیٹ ورک کا سینئر رکن تھا جو مسلح دہشت گردوں کو لائن آف کنٹرول عبور کرانے کا ذمہ دار ہے۔ حکام نے اس ہلاکت کو تنظیم کیلئےبڑا دھچکا قرار دیا ہے۔
فوج نے اس کارروائی کے دوران بھاری مقدار میں اسلحہ و گولہ بارود بھی برآمد کیا ہے جن میں ایک اے کے طرز کی رائفل، دو میگزین، دو پستول، چار میگزین‘۵۸گولیاں، تین ہتھ گولے، ایک موبائل فون، دو سم کارڈ اور کچھ پاکستانی کرنسی شامل ہیں۔ حکام کے مطابق اس کا ساتھی جھڑپ کے دوران واپس پاکستانی علاقے کی طرف بھاگنے میں کامیاب ہوگیا۔
ادھر ممکنہ مزید دراندازی کے خدشے کے پیش نظر لائن آف کنٹرول پر چوکسی انتہائی درجے تک بڑھا دی گئی ہے۔ فوجی دستوں کی تعیناتی میں اضافہ کیا گیا ہے اور رات کے اوقات میں نگرانی کے آلات، ایل او سی لائٹنگ سسٹم اور دستوں کی پیٹرولنگ میں نمایاں اضافہ کیا گیا ہے۔
فوج نے واضح کیا ہے کہ سرحد پار سے کی جانے والی ایسی کوششوں کو مضبوط ہاتھوں سے نمٹا جائے گا اور اس سلسلے میں کسی بھی قیمت پر چوکسی میں کمی نہیں آنے دی جائے گی۔
ذرائع کا کہنا ہے کہ دہشت گردوں کی سرگرمیوں میں اضافہ موسم میں بہتری کے ساتھ مربوط ہے، اور اس سال سرحد پار سے دراندازی کی کوششیں تیز ہونے کا خدشہ ظاہر کیا جا رہا ہے۔ اسی پس منظر میں آپریشن کو وسعت دی گئی ہے تاکہ نہ صرف فرار شدہ دہشت گرد کو گرفتار یا ہلاک کیا جا سکے بلکہ کسی نئی دراندازی کو بھی وقت پر روکا جا سکے۔
فوجی ذرائع کے مطابق ہم کسی بھی ممکنہ خطرے کو نظرانداز نہیں کر سکتے۔ ایل او سی کے قریب ہر نقل و حرکت پر گہری نظر رکھی جا رہی ہے۔
