ایجنسیز
جموں؍۱۱مارچ
فوج کی شمالی کمان کے سربراہ لیفٹیننٹ جنرل پرتیِک شرما نے نوشہرہ سیکٹر میں دراندازی کی کوشش ناکام بنانے والے فوجی اہلکاروں کو شاندار خراجِ تحسین پیش کیا ہے۔
انہوں نے کہا کہ سرحد پر تعینات فورسز نے انتہائی ہوشیاری اور بہادری کا مظاہرہ کرتے ہوئے ایک پاکستانی حمایت یافتہ دہشت گرد کو ہلاک کیا اور سرحد کو محفوظ بنایا۔
فوج کے مطابق سرحد پار سے دو مشتبہ افراد کی نقل و حرکت دیکھ کر اہلکار فوراً حرکت میں آگئے اور مشکوک سرگرمی کا بروقت جواب دیا۔ جوابی کارروائی میں ایک درانداز مارا گیا جبکہ علاقے کو کلیئر کرنے کے لیے اضافی دستوں کو تعینات کیا گیا۔
لیفٹیننٹ جنرل پرتیِک شرما نے کہا کہ سرحدوں کی حفاظت کے لیے کوئی کسر نہ چھوڑی جائے گی اور وادی کو دہشت گردی سے پاک رکھنے کا عزم پہلے سے زیادہ مضبوط ہے۔ انہوں نے اہلکاروں کی مستعدی، فرض شناسی اور ہمت کی تعریف کرتے ہوئے کہا کہ سرحدوں پر تعینات جوان وطن کے اصل محافظ ہیں اور ان کی بہادری ہی ہماری سلامتی کی ضمانت ہے۔
فوجی حکام کا کہنا ہے کہ حالیہ سرگرمیوں کے بعد سرحدی پٹی پر نگرانی مزید سخت کر دی گئی ہے تاکہ دشمن عناصر کی کسی نئی کوشش کو ناکام بنایا جا سکے
