ایجنسیز
جموں؍۴ مارچ
بھارتی فوج نے راجوری اور پونچھ سیکٹر میں اپنی نئی قائم کی گئی پورٹر کمپنی کے لیے۸۰۰پورٹرز کی بھرتی کرنے کا فیصلہ کیا ہے۔ اس سلسلے میں۱۲مارچ سے بھرتی ریلیوں کا انعقاد کیا جائے گا۔
حکام کے مطابق آرمی پورٹر کمپنی کے لیے۶۰۰ پورٹرز اور۲۰۰ریزرو پورٹرز کی بھرتی کے لیے راجوری اور پونچھ اضلاع کے سات مقامات پر بھرتی ریلیاں منعقد کی جائیں گی۔
سرکاری اشتہار کے مطابق۲۷۹پورٹر کمپنی کو وزارت دفاع کے تحت یکم اپریل سے۲۶ستمبر تک۱۷۹ دنوں کے لیے قائم کیا جا رہا ہے۔
بھرتی ریلیاں۱۲سے۱۹مارچ کے دوران راجوری اور پونچھ کے سات بریگیڈ ہیڈکوارٹروں میں منعقد ہوں گی۔ شیڈول کے مطابق۱۲؍اور۱۳مارچ کو پونچھ اور راجوری میں،۱۴؍اور۱۵ مارچ کو بالنوئی اور نوشہرہ میں،۱۶؍ اور۱۷ مارچ کو بھمبر گلی میں جبکہ۱۸؍اور۱۹مارچ کو مینڈھر اور منجاکوٹ میں بھرتی عمل انجام دیا جائے گا۔
اشتہار کے مطابق امیدوار کا بھارتی شہری ہونا، جسمانی طور پر صحت مند ہونا اور عمر۱۸سے۴۰سال کے درمیان ہونا ضروری ہے۔
امیدواروں کو ہدایت دی گئی ہے کہ وہ اپنے اصل دستاویزات کے ساتھ آدھار کارڈ، پین کارڈ، ووٹر آئی ڈی کارڈ یا ڈرائیونگ لائسنس کی پانچ تصدیق شدہ نقول ساتھ لائیں۔
اس کے علاوہ امیدواروں کو متعلقہ گاؤں کے سرپنچ کی جانب سے جاری کردہ کردار سرٹیفکیٹ، مجاز میڈیکل اہلکار کی جانب سے جاری کردہ میڈیکل فٹنس سرٹیفکیٹ اور پولیس ویری فکیشن سرٹیفکیٹ بھی اصل حالت میں پیش کرنا ہوگا۔
حکام نے اہل امیدواروں کو ہدایت دی ہے کہ وہ مقررہ تاریخوں پر متعلقہ بریگیڈ ہیڈکوارٹرز پر بھرتی کے عمل میں شرکت کے لیے حاضر ہوں۔
