شوپیاں میں پٹواری۲۵ہزار روپے رشوت لیتے ہوئے گرفتار

جموں کشمیر اینٹی کرپشن بیورو(اے سی بی) نے بدعنوانی کے خلاف جاری مہم کے تحت ایک کارروائی انجام دیتے ہوئے پٹواری حلقہ پنجورہ پہلی پورہ، شوپیاں‘عاشق حسین شاہ کو۲۵ہزار روپے رشوت طلب کرنے اور وصول کرنے کے الزام میں رنگے ہاتھوں گرفتار کر لیا۔
اے سی بی کے مطابق۲۰دسمبر ۲۰۲۵کو ایک تحریری شکایت موصول ہوئی جس میں شکایت کنندہ نے الزام لگایا کہ اس نے اپنی اہلیہ اور سالی کو ان کے آبائی جائیداد میں برابر کا حصہ دلانے کے لیے تحصیل دفتر شوپیاں میں درخواست دی تھی۔ یہ درخواست تقریباً تین ماہ قبل تحصیلدار شوپیاں کے سامنے پیش کی گئی، جسے بعد ازاں متعلقہ پٹواری کو کارروائی کے لیے بھیج دیا گیا۔
شکایت کے مطابق، جب درخواست گزار نے پٹواری عاشق حسین شاہ سے رجوع کیا تو اس نے رپورٹ دینے کے عوض۲۵ہزار روپے رشوت کا مطالبہ کیا۔ شکایت کنندہ نے رشوت دینے سے انکار کرتے ہوئے قانونی کارروائی کے لیے اینٹی کرپشن بیورو سے رجوع کیا۔
اے سی بی نے شکایت موصول ہونے کے بعد خفیہ جانچ پڑتال کی، جس میں رشوت کے مطالبے کی تصدیق ہو گئی۔ اس کے بعد کیس ایف آئی آر نمبر۲۰۲۵/۰۵زیر دفعہ انسداد بدعنوانی ایکٹ۱۹۸۸پولیس اسٹیشن اے سی بی اننت ناگ میں درج کر کے تحقیقات شروع کی گئی۔
تحقیقات کے دوران ایک خصوصی ٹریپ ٹیم تشکیل دی گئی، جس نے منصوبہ بندی کے تحت کارروائی کرتے ہوئے پٹواری کو رشوت لیتے ہوئے موقع پر ہی گرفتار کر لیا۔ رشوت کی رقم بھی آزاد گواہوں کی موجودگی میں ملزم کے قبضے سے برآمد کی گئی۔
بعد ازاں، ملزم کے رہائشی مکان کی بھی تلاشی لی گئی۔ اس کیس کی مزید تفتیش جاری ہے ۔
اینٹی کرپشن بیورو نے عوام سے اپیل کی ہے کہ وہ بدعنوانی کے خلاف آگے آئیں اور کسی بھی غیر قانونی مطالبے کی فوری اطلاع متعلقہ اداروں کو دیں تاکہ شفاف اور جوابدہ نظام کو یقینی بنایا جا سکے