منشیات فروش کی ایک کروڑ روپے مالیت کی جائیداد ضبط

جموں کشمیر پولیس نے منشیات کے خلاف اپنی مسلسل اور فیصلہ کن مہم کے تحت سرینگر میں ایک بدنام زمانہ منشیات فروش کی ایک کروڑ روپے مالیت کی جائیداد ضبط کر لی ہے ۔
پولیس نے بتایا کہ ضبط کی گئی جائیداد باسط بلال ڈار ولد بلال احمد ڈار، ساکن وانٹہ پورہ عیدگاہ سرینگر کی ملکیت ہے ، جو منشیات کی اسمگلنگ کے متعدد مقدمات میں ملوث ہے ۔
ملزم کے خلاف پولیس اسٹیشن نوہٹہ میں درج ایف آئی آر نمبر۲۰۲۴/۵۹دفعات۲۱/۸؍این ڈی پی ایس ایکٹ) جبکہ پولیس اسٹیشن صفاکدل میں درج ایف آئی آر نمبر۲۰۲۵/۱۱۴(دفعات۲۹۔۲۲/۸این ڈی پی ایس ایکٹ کے تحت تحقیقات جاری ہیں)۔
پولیس کے مطابق دورانِ تفتیش یہ بات سامنے آئی کہ مذکورہ رہائشی مکان منشیات کی غیر قانونی تجارت سے حاصل شدہ رقم سے تعمیر کیا گیا تھا۔ اسی بنیاد پر این ڈی پی ایس ایکٹ کی دفعہ ۶۸ایف کے تحت قانونی کارروائی عمل میں لاتے ہوئے جائیداد کو ضبط کیا گیا۔ ضبطی کی یہ کارروائی تمام قانونی ضابطوں کے مطابق دو آزاد گواہوں کی موجودگی میں انجام دی گئی۔
حکم نامے کے مطابق جائیداد کے مالک کو تاحکمِ ثانی اس پراپرٹی کو فروخت کرنے ، لیز پر دینے ، منتقل کرنے یا کسی بھی قسم کا تیسرا حق قائم کرنے سے روک دیا گیا ہے ۔
جموں و کشمیر پولیس نے واضح کیا ہے کہ منشیات کے خلاف جنگ میں صرف ملزمان ہی نہیں بلکہ منشیات کی کمائی سے بنائے گئے اثاثے بھی قانون کے دائرے میں لائے جائیں گے ۔
پولیس نے عوام سے اپیل کی ہے کہ وہ منشیات کے ناسور کے خاتمے کے لیے تعاون کریں اور کسی بھی مشتبہ سرگرمی کی اطلاع فوری طور پر پولیس کو دیں۔