جے کے اے ایس کے امیدواروں کی بھوک ہڑتال

جموں/۶دسمبر
جموں کشمیر ایڈمنسٹریٹو سروس (جے کے اے ایس) کے درجنوں امیدواروں نے ہفتے کو یہاں مہاراجہ ہری سنگھ پارک میں اپنے مطالبوں عمر کی حد کو بڑھانے اور امتحان کو موخر کے لئے بھوک ہڑتال کی۔
اس موقع پر ایک امید وار نے میڈیا کو بتایا’’ہم یہاں گذشتہ روز۳بجے سے پر امن بھوک ہڑتال پر ہیں، ہمیں یقین دلایا گیا تھا کہ ہماری عمر کی حد میں رعایت کی جائے گی‘‘۔
انہوں نے کہا’’ہمیں در در کی ٹھوکریں کھانا پڑتی ہیں ہمیں یہ معلوم ہی نہیں ہے کہ ہماری فائل کہاں ہے‘‘۔ان کا کہنا تھا’’ہماری سرکار سے گذارش ہے کہ ہماری عمر کی حد میں رعایت دی جائے اور امتحان جو کل ہونے والا ہے اس کو موخر کیا جائے‘‘۔
دریں اثنا سی پی آئی (ایم) کے سینئر لیڈر اور رکن اسمبلی محمد یوسف تاریگامی نے بھی جے کے اے ایس کے کل ہونے والے امتحان کو موخر کرنے کی اپیل کی ہے ۔
انہوں نے’ایکس‘پر اپنے ایک پوسٹ میں کہا’’جے کے اے ایس کے امیدواروں کے لیے عمر کی حد کو بڑھانے کی تجویز منظوری کیلئے راج بھون بھیج دی گئی ہے جبکہ امتحان کل سے شروع ہونے والا ہے ‘‘۔
ان کا کہنا تھا’’امتحان کا انعقاد اس وقت بھی جب کہ اس طرح کا ایک اہم فیصلہ ابھی بھی زیر التوا ہے ،امیدواروں کے لئے باعث نقصان ہے ‘‘۔
کمیونسٹ لیڈر نے کہا کہ اس کے علاوہ، جموں و کشمیر سے باہر سفر کرنے والے کئی امیدوار پروازیں منسوخ ہونے کی وجہ سے درماندہ ہیں۔امتحان کو اس وقت تک موخر کر دینا چاہیے جب تک کہ منظوری کا عمل مکمل نہیں ہو جاتا ہے ۔
۔۔۔۔۔۔۔ایجنسیز