جموں/۱۵نومبر
منشیات کے عادی مجرموں کے خلاف ایک فیصلہ کن کارروائی میں جموں کشمیر پولیس نے ضلع اودھم پور کے چننی علاقے میں ضلع انتظامیہ کے ساتھ مل کر ایک بدنام زمانہ منشیات فروش کی غیر قانونی طور پر تعمیر کی گئی کروڑوں روپیے مالیت کی جائیداد کو مسمار کر دیا۔
ایک پولیس ترجمان نے بتایا کہ اودھم پور پولیس نے ضلع انتظامیہ کے ساتھ مل کر ایک بدنام زمانہ منشیات فروش کی غیر قانونی طور پر تعمیر کی گئی کروڑوں روپیے مالیت کی جائیداد کو مسمار کر دیا۔
منشیات فروش کی شناخت مکھن دین ولد حکیم دین ساکن نر سو چننی کے طور پر کی گئی ہے ۔
ترجمان نے کہا کہ مکھن دین ایک جرائم پیشہ فرد تھا اور پولیس اسٹیشن چننی میں درج ایک ایف آئی آر نمبر۲۰۲۴/۱۸۸میں ملوث پایا گیا تھا۔
پولیس ترجمان نے بتایا کہ منشیات کی اسمگلنگ میں مسلسل ملوث رہنے کی وجہ سے اس کو پی آئی ٹی این ڈی پی ایس ایکٹ کے تحت حراست میں بھی لیا گیا تھا اور وہ اس وقت کوٹ بلوال جیل جموں میں بند ہے ۔
ترجمان نے کہا کہ تحقیقات کے دوران تفتیشی افسروں نے پایا کہ ملزم نے سرکاری زمین پر قبضہ کرکے قومی شاہراہ نرسو چننی پر ۵تجارتی عمارتیں اور ایک رہائشی عمارت تعمیر کی ہے جن کی ملکیت کروڑوں روپیوں میں ہے ۔
ان کا کہنا ہے کہ منشیات کی تجارت سے حاصل شدہ آمدنی سے تعمیر کی گئی اس غیر قانونی جائیداد کو ضلع میں منشیات فروشوں کے خلاف جاری مہم کے تحت مسمار کر دیا گیا۔ایجنسیز
