پاکستان کے حمایت یافتہ سوشل میڈیا ہینڈل کا ہندوستانی فضائیہ کا طیارہ گرنے کا دعوی غلط

نئی دہلی/۱۵نومبر
ہندوستان نے پاکستان کے حمایت یافتہ سوشل میڈیا ہینڈلز کے ان دعوؤں کو بے بنیاد اور جعلی قرار دیا ہے کہ جمعہ کو دو گھنٹے کے اندر ہندوستانی فضائیہ کے تین طیارے ’نامعلوم الیکٹرانک مداخلت‘کی وجہ سے گر کر تباہ ہوئے ۔
یہ دعوے جمعہ کو چنئی کے قریب معمول کی پرواز کے دوران ہندوستانی فضائیہ کا ایک تربیتی طیارہ گر کر تباہ ہونے کے بعد کیا گیا ہے ۔
ہندوستان نے ان دعوؤں کو مکمل طور پر بے بنیاد اور جعلی قرار دے کر مسترد کر دیا۔ وزارت اطلاعات و نشریات کے پریس انفارمیشن بیورو کی فیکٹ چیکنگ ٹیم نے واضح کیا کہ پاکستان کے حمایت یافتہ ہینڈلز کے دعوے جھوٹے ہیں۔
ایکس پر حقائق کی جانچ پڑتال کرنے والی پوسٹ میں کہا گیا ہے’’انڈین ایئر فورس نے باضابطہ طور پر واضح کیا ہے کہ انڈین ایئر فورس کا پی سی۷؍ ایم کے ٹو ٹرینر طیارہ جمعہ کو تمبارم، چنئی کے قریب معمول کے تربیتی مشن کے دوران گر کر تباہ ہوا تھا۔ پائلٹ بحفاظت باہر نکل گیا اور شہری املاک کو کوئی نقصان نہیں پہنچا‘‘۔
پی آئی بی نے لوگوں پر زور دیا ہے کہ وہ غلط معلومات کا شکار نہ ہوں۔ اس طرح کے دعووں پر یقین کرنے یا ان کا اشتراک کرنے سے پہلے ان کی ہمیشہ سرکاری ذرائع سے تصدیق کریں۔
فضائیہ کے تربیتی طیارے کے گر کر تباہ ہونے کے چند گھنٹے بعد اسلام آباد کے جھوٹے بیانیے کا پرچار کرنے والے کئی ہینڈلز سوشل میڈیا کی ٹائم لائنز پر نمودار ہوئے ۔ انہوں نے لکھاکہ’’ابھی، نامعلوم الیکٹرانک مداخلت کی وجہ سے دو گھنٹے کے اندر ہندوستانی فضائیہ کے تین طیارے گر کر تباہ ہو گئے ۔‘‘