جموں/۶نومبر
آن لائن فراڈ سے حاصل شدہ غیر قانونی منافع کے خلاف ایک بڑی کارروائی کے تحت پونچھ پولیس نے بھارتیہ ناگرک سرکشا سنتھا(بی این ایس ایس) کی دفعہ۱۰۷کے تحت تقریباً ۵ء۸لاکھ رویے مالیت کی جائیداد کو ضبط کیا ہے ۔
ایک پولیس ترجمان نے بتایا کہ پولیس اسٹیشن سرنکوٹ میں بی این ایس ایس کی متعلقہ دفعات اور آئی ٹی ایکٹ کی متعلقہ دفعات کے تحت درج ایف آئی آر زیر نمبر۲۰۲۵/۷۱کی تحقیقات کے دوران انکشاف ہوا کہ ملزم ساجد خان ولد محمد صادق ساکن دروغین سرنکوٹ نے ایک ماروتی سوزوکی کی بریزا کارکو فراڈ، جعلسازی اور ٹیلیگرام ایپلی کیشن اور ڈریم ۱۱پلیٹ فارم کے ذریعے لوگوں کو دھوکہ دے کر حاصل شدہ رقم سے خریدی تھی۔
ترجمان نے کہا کہ مجاز اتھارٹی کی ہدایت پر اور قانونی تقاضوں کے مطابق بی این ایس ایس کی دفعہ۱۰۷کے تحت مذکورہ گاڑی کو ضبط کیا گیا تاکہ اس کو بیچا یا منتقل یا کسی کے حوالے نہ کیا جائے ۔
پولیس ترجمان نے کہا کہ گاڑی پر ضبطی نوٹس بھی چسپاں کی گئی ہے جس میں عام لوگوں کو متنبہ کیا گیا ہے کہ مزید احکامات تک کوئی بھی شخص اس جائیداد کو خریدنے ، لیز پر دینے یا اس میں کسی تیسرے فریق کا مفاد پیدا کرنے کی کوشش نہ کرے ۔
ترجمان کہا کہ پونچھ پولیس غیر قانونی ذرائع سے حاصل شدہ جائیدادوں کی نشاندہی، ضبطگی اور قرقی کیلئے قانون کے مطابق پر عزم ہے ۔
۔۔۔۔۔۔۔۔۔
