جموں و کشمیر میں خشک موسم کی پیشگوئی‘درجہ حرارت میں کمی متوقع

سرینگر/۶ نومبر
محکمہ موسمیات نے جموں و کشمیر میں۶سے۱۶ نومبر تک خشک موسم کی پیشگوئی کی ہے۔ وادی بھر میں بارش یا برفباری کے کوئی امکانات نہیں ہیں، تاہم دن کے درجہ حرارت میں معمولی اضافہ اور راتوں کو سردی میں مزید شدت متوقع ہے۔
محکمہ موسمیات کے ترجمان کے مطابق، اگلے دس دنوں تک موسم مجموعی طور پر خشک اور صاف رہے گا، جس کے دوران وادی کے بیشتر علاقوں میں صبح کے وقت کہر چھائے رہنے کا امکان ہے۔ پہاڑی علاقوں میں رات کے درجہ حرارت میں نمایاں کمی دیکھی جائے گی، جبکہ میدانوں میں دن کے وقت دھوپ نکلنے سے قدرے راحت محسوس ہوگی۔
سرینگر میں بدھ کو کم سے کم درجہ حرارت۸ء۲ ڈگری سینٹی گریڈ ریکارڈ کیا گیا، جو معمول سے ایک ڈگری کم ہے۔ گلمرگ میں منفی۵ء۱ ڈگری اور پہلگام میں۶ء۰ ڈگری درج کیا گیا۔ جموں میں کم سے کم درجہ حرارت ۴ء۱۳ ڈگری رہا۔
محکمہ نے کہا کہ نومبر کے وسط تک موسم میں کسی بڑی تبدیلی کے امکانات نہیں، البتہ۱۷ نومبر کے بعد مغربی ہواؤں کے ایک نئے سلسلے کے داخل ہونے کا امکان ہے جو بالائی علاقوں میں ہلکی برفباری یا بارش کا باعث بن سکتا ہے۔
کاشتکاروں کو مشورہ دیا گیا ہے کہ وہ خشک موسم کا فائدہ اٹھاتے ہوئے کھیتوں میں موسم سرما کی فصلوں کی تیاری مکمل کریں، جبکہ مسافروں سے کہا گیا ہے کہ وہ صبح کے وقت کہر کے دوران سفر میں احتیاط برتیں۔ایجنسیز
۔۔۔۔۔۔۔۔۔۔۔۔۔