سرینگر/۴نومبر
جموں کشمیر کے ضلع بڈگام میں ضمنی انتخابات کے دوران پیپلز ڈیموکریٹک پارٹی پی ڈی پی کے امیدوار آغا سید منتظر مہدی کو مثالی ضابطہ اخلاق کی مبینہ خلاف ورزی پر نوٹس جاری کیا گیا ہے ۔
حکام کے مطابق امیدوار پر بغیر اجازت دیر رات سیاسی ریلیاں منعقد کرنے کا الزام ہے ۔
نوڈل آفیسر برائے ماڈل کوڈ آف کنڈکٹ کی جانب سے جاری نوٹس میں کہا گیا ہے کہ یکم اور۳نومبر کو آغا منتظر نے بڈگام حلقے کے مختلف علاقوں میں بغیر اجازت انتخابی ریلیاں اور جلوس نکالے ، جن کی ویڈیوز سوشل میڈیا پر وائرل ہوئیں۔
نوٹس کے مطابق سوشل میڈیا پر سامنے آنے والی ویڈیوز سے بادی النظر میں ضابطہ اخلاق کی خلاف ورزی ثابت ہوتی ہے ۔ ایسے اقدامات انتخابی عمل کی شفافیت کو متاثر کرتے ہیں، مسابقتی ماحول کو نقصان پہنچاتے ہیں، اور ماڈل کوڈ آف کنڈکٹ کی کھلی خلاف ورزی ہیں۔
الیکشن حکام نے پی ڈی پی امیدوار کو۲۴گھنٹوں کے اندر تحریری وضاحت پیش کرنے کی ہدایت دی ہے کہ ان کے خلاف کارروائی کیوں نہ کی جائے ۔ نوٹس میں مزید خبردار کیا گیا ہے کہ اگر آئندہ بھی ضابطہ اخلاق کی کوئی خلاف ورزی دیکھی گئی تو ان کے خلاف سخت قانونی کارروائی عمل میں لائی جائے گی۔
ذرائع کے مطابق ضلع انتظامیہ نے اس معاملے پر تفصیلی رپورٹ ریٹرننگ آفیسر کو بھیج دی ہے تاکہ ضابطہ اخلاق کی عمل آوری کو یقینی بنایا جا سکے ۔
یاد رہے کہ بڈگام حلقے میں ضمنی انتخاب کے لیے سیاسی سرگرمیاں گزشتہ چند دنوں میں تیز ہو گئی ہیں اور مختلف جماعتوں کے امیدوار گاؤں گاؤں جا کر عوامی رابطہ مہم چلا رہے ہیں۔ تاہم، الیکشن کمیشن نے تمام امیدواروں کو ہدایت دی ہے کہ وہ انتخابی ضوابط اور وقت کی پابندی کا خاص خیال رکھیں تاکہ شفاف اور منصفانہ انتخابی عمل کو برقرار رکھا جا سکے ۔ایجنسیز
۔۔۔۔۔۔۔۔۔۔۔
