بہار کو نقل مکانی نہیں، بلکہ از سرِ نو تعمیر کی ضرورت ہے : کانگریس

نئی دہلی، 3 نومبر (یو این آئی) کانگریس نے کہا ہے کہ بی جے پی-جے ڈی یو کے دو دہائیوں کے اقتدار نے بہار کو تباہ کرکے صنعتی نقشے سے تقریباً مٹا دیا ہے ، اسی وجہ سے باصلاحیت افراد کو نقل مکانی کرنی پڑی ہے ، مگر اب بہار کو بچانے اور اس کی دوبارہ تعمیر کی ضرورت ہے ۔
کانگریس کے شعبئہ ابلاغ کے انچارج جے رام رمیش نے پیر کے روز ایک بیان میں کہا کہ جو بہار کبھی چینی، کاغذ، جوٹ، ریشم اور ڈیری صنعت کے لیے مشہور تھا، وہ آج بے روزگاری اور نقل مکانی کی علامت بن گیا ہے ۔ بی جے پی-جے ڈی یو نے 20 برس کے اقتدار میں بے پناہ صنعتی امکانات والے بہار میں صرف ‘نقل مکانی کی صنعت’ قائم کی ہے اور بہار کو ترقی و صنعت کے قومی نقشے سے تقریباً مٹا دیا ہے ۔
انہوں نے کہا کہ کانگریس نے ہمیشہ بہار کے مفاد میں کام کیا، اور آزادی کے بعد غیر منقسم بہار میں پارٹی کی حکومتوں نے متعدد صنعتی یونٹس قائم کیے ، جن کی بدولت یہ ریاست ملک کے صنعتی نقشے پر مضبوطی سے قائم ہوئی۔ اس دور میں بھاری صنعتوں، توانائی، ڈیری اور ریل پیداوار کے شعبوں میں بہار میں ترقی کا پہیہ تیزی سے گھوم رہا تھا۔
کانگریس کے دورِ حکومت میں قائم اہم صنعتی یونٹس کا ذکر کرتے ہوئے انہوں نے کہا کہ برونی آئل ریفائنری نے بہار کو توانائی پیداوار کا مرکز بنایا تھا، جب کہ سندری اور برونی کھاد فیکٹری نے نہ صرف بہار بلکہ پورے ملک کی غذائی سلامتی میں اہم کردار ادا کیا۔ اسی طرح برونی ڈیری اور آج کی سدھا ڈیری کی بنیاد رکھی گئی اور بیلا میں ریل وہیل فیکٹری قائم کی گئی۔
مڈھورا میں ڈیزل لوکوموٹیو فیکٹری، نوین نگر تھرمل پروجیکٹ اور سدھا کوآپریٹو ڈیری نیٹ ورک کی بنیاد کانگریس کی حکومتوں نے رکھی تھی۔
مسٹر رام رمیش نے بہار میں بند ہو چکی فیکٹریوں کا ذکر کرتے ہوئے کہا کہ ایک طرف کانگریس حکومتوں نے وژن کے ساتھ بہار میں صنعتی ترقی کی بنیاد رکھی، جبکہ بی جے پی-جے ڈی یو حکومت نے کوئی اہم صنعت قائم کرنے کے بجائے پرانی صنعتوں کو کھنڈر میں بدل دیا۔