جموں/۱۴؍اکتوبر
جموںکشمیر کے ضلع ریاسی کے کٹرہ علاقے میں منگل کی صبح ایک سڑک حادثے میں ۳؍افراد کی موقع پر ہی موت واقع ہوئی جبکہ۲دیگر شدید زخمی ہوگئے ۔
ذرائع نے بتایا کہ کٹرہ ہیلی پیڈ کے مقام پر منگل کی صبح ایک بس اور ایک آٹو رکشا کے درمیان زور دار ٹکر ہوگئی۔ انہوں نے کہا کہ یہ حادثہ اس قدر بھیانک تھا کہ اس کے نتیجے میں ۳؍افراد کی موقع پر ہی موت ہوگئی جبکہ۲دیگر زخمی ہوگئے ۔
ان کا کہنا ہے کہ متوفین میں آٹو ڈرائیور اور دو یاتری شامل ہیں۔ ان کا کہنا ہے کہ زخمیوں کو علاج و معالجے کے لئے پہلے سی ایچ سی کٹرہ پہنچایا گیا جہاں سے ان کو گورنمنٹ میڈیکل کالج جموں ریفر کیا گیا۔
متوفین اور زخمیوں کی شناخت فی الوقت معلوم نہیں ہوئی ہے ۔ دریں اثنا پولیس نے جائے موقع پر پہنچ کر قانونی کارروائیاں شروع کی ہے۔
جموں و کشمیر کے وزیر اعلیٰ عمر عبداللہ نے حادثے پر افسوس کا اظہار کرکے غمزدہ کنبوں کے ساتھ اظہار ہمدردی کیا۔
وزیر اعلیٰ نے اس واقعے پر افسوس کا اظہار کیا اور غمزدہ کنبوں کے ساتھ اظہار ہمدردی کیا۔ ان کے’ایکس‘ہینڈل پر ایک پوسٹ میں کہا گیا’’وزیر اعلیٰ نے کٹرہ کے قریب المناک سڑک حادثہ پر گہرے دکھ کا اظہار کیا‘‘۔ پوسٹ میں مزید کہا گیا’’انہوں نے سوگوار خاندانوں سے دلی تعزیت کا اظہار کیا اور زخمیوں کی جلد صحت یابی کی دعا کی۔ایجنسیز‘‘
