حکومت کسانوں کو پیداوار کی مناسب قیمت دلانے میں ناکام: اکھلیش

لکھنؤ، 6 اکتوبر (یو این آئی) سماج وادی پارٹی (ایس پی) کے صدر اکھلیش یادو نے الزام لگایا ہے کہ اتر پردیش کی بی جے پی حکومت کسانوں کو ان کی پیداوار کی مناسب قیمت دلانے میں ناکام رہی ہے اور حکومت کا دلالوں پر کوئی کنٹرول نہیں ہے ۔
مسٹر یادو نے پیر کے روز کہا کہ بی جے پی حکومت کسانوں کو دھان اور دیگر فصلوں کے لیے ڈی اے پی، یوریا اور دیگر کھاد وقت پر مہیا نہیں کرا سکی ہے ۔
کسان کھاد کے لیے قطاروں میں کھڑا رہا، کئی کسانوں کی جانیں چلی گئیں، لیکن بے حس بی جے پی حکومت نے کسانوں کی کوئی پرواہ نہیں کی، جبکہ اب گندم، آلو، چنا، مٹر اور دیگر فصلوں کے لیے کسانوں کو ڈی اے پی اور دیگر کھاد کی ضرورت ہے ، مگر حکومت کی کوئی تیاری نہیں ہے ۔
بی جے پی حکومت میں کالا بازاری اور منافع خوری عروج پر ہے ۔
انہوں نے کہا کہ کسان اپنی محنت سے فصل اگاتا ہے ، لیکن لاگت پورا کرنا بھی مشکل ہو گیا ہے ۔ بی جے پی حکومت میں آلو، گنا، دھان، گندم کے کسانوں کو صحیح دام نہیں مل رہا ہے ، بی جے پی حکومت کسانوں کو دھوکہ دے رہی ہے ۔
کسانوں کی آمدنی دگنی نہیں ہوئی، گنے کی قیمتوں کے بارے میں حکومت خاموش ہے ، آلو کے کسانوں کو کافی نقصان ہو رہا ہے ۔ کسانوں کو آلو کی لاگت کی قیمت بھی نہیں مل پائی ہے ، اس حکومت میں دلالوں کا راج ہے ۔
مسٹر یادو نے کہا کہ آج دلال منافع کما رہے ہیں اورکسان پریشان ہیں۔
جب بھی بی جے پی حکومت میں آتی ہے ، کسان تباہ ہو جاتا ہے ۔ پوری ریاست میں کسانوں کی زمینوں اور فصلوں کی لوٹ مار ہو رہی ہے ۔