سرینگر//
منشیات کی بدعت کے خلاف ایک بڑی کارروائی میں جموں و کشمیر پولیس نے جنوبی کشمیر کے ضلع شوپیاں میں۳منشیات فروشوں کو گرفتار کرکے ان کی تحویل سے چرس جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن شوپیاں کی ایک ٹیم نے اگلر علاقے میں فروٹ منڈی کے نزدیک ایک ناکہ لگا دیا۔
ترجمان نے کہا کہ ناکے کے دوران ایک آلٹو کے۱۰گاڑی کو روکنے کا اشارہ کیا گیا۔ان کا کہنا ہے کہ پولیس کو دیکھ کر ڈرائیور نے جائے موقع سے فرار ہونے کی کوشش کی تاہم پولیس ٹیم نے گاڑی کا تعاقب کرکے رام بیرا برج کے نزدیک گاڑی میں سوار افراد کو دھر لیا۔
پولیس ترجمان نے بتایا کہ تلاشی کے دوران گاڑی سے۵ء۱کلو چرس جیسا ممنوعہ مواد بر آمد کیا گیا جس کے بعد تینوں کو گرفتار کیا گیا۔
گرفتار شدگان کی شناخت سہیل احمد راتھر ولد طارق احمد راتھر ساکن تکہ محلہ شوپیاں، معروف احمد وانی ولد عبد النبی وانی ساکن کلورہ ملک گنڈ اور فردوس احمد الائی ولد عبد الغنی الائی ساکن ملہورہ کے طور پر کی گئی ہے ۔انہوں نے کہا کہ اس سلسلے میں پولیس اسٹیشن شوپیاں میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئی۔
اس دوران پولیس نے ضلع کٹھوعہ کے ہیرا نگر علاقے میں ایک منشیات فروش کو گرفتار کرکے اس کی تحویل سے ہیروئن جیسا مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن ہیرا نگر کی ایک ٹیم نے چھن مورین علاقے کے نزدیک ایک پل پر ناکے کے دوران ایک مشکوک شخص کو روکا۔انہوں نے کہا کہ تلاشی کے دوران اس کی تحویل سے قریب۵۴ء۶گرام ہیرون جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت ظفر اقبال ولد لال حسین ساکن بھمبرواہ کٹھوعہ کے طور پر کی گئی۔بیان میں کہا گیا کہ اس سلسلے میں پولیس اسٹیشن ہیرا نگر میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔انہوں نے کہا کہ پولیس ضلع سے منشیات کی بیخ کنی کو یقینی کو یقینی بنانے کیلئے پر عزم ہے ۔
