نئی دہلی//
فوج نے محفوظ امرناتھ یاترا کیلئے سول انتظامیہ اور سینٹرل آرمڈ پولیس فورسز کے ساتھ مل کر’آپریشن شیوا‘ شروع کیا ہے ۔
اس خصوصی آپریشن کا مقصد امرناتھ یاترا کے شمالی اور جنوبی دونوں راستوں پر بالخصوص آپریشن سندور کے بعد دہشت گردوں کے بڑھتے ہوئے خطرے کے پیش نظر مضبوط اور سخت سکیورٹی فراہم کرنا ہے ۔
اس سال سلامتی مہم کے لیے ٹیکنالوجی اور دیگر ضروری وسائل سے لیس۸۵۰۰سے زائد سپاہیوں کو تعینات کیا گیا ہے ۔ اس کے ساتھ ہی انسداد دہشت گردی گرڈ بنانے ، سکیورٹی کی تعیناتی اور یاتریوں کے راستوں کی سکیورٹی کے لیے بھی اقدامات کیے گئے ہیں۔
سول حکام بالخصوص ڈیزاسٹر مینجمنٹ اور ایمرجنسی ڈپارٹمنٹ کے حکام کو مدد فراہم کی جا رہی ہے ۔
فوج نے ڈرون حملے کے خطرات سے نمٹنے کے لیے۵۰سے زیادہ اینٹی ڈرون سسٹم بھی تعینات کیے ہیں۔ یاتریوں کے راستوں اور امرناتھ گپھا کی نگرانی کیلئے ڈرون مشن چلایا جا رہا ہے ۔
’انجینئر ٹاسک فورس‘کو پل کی تعمیر، سڑک کو چوڑا کرنے اور آفات کے خطرے کو کم کرنے کیلئے تعینات کیا گیا ہے ۔
امرناتھ یاتریوں اور دیگر کو طبی سہولیات فراہم کرنے کیلئے۱۵۰سے زیادہ ڈاکٹروں اور طبی عملہ، دو ایڈوانس ڈریسنگ اسٹیشن، نو طبی امدادی چوکیاں‘۱۰۰بستروں کا اسپتال کا بندوبست کیا گیا اور۲۶آکسیجن بوتھ۲لاکھ لیٹر آکسیجن سے لیس کیے گئے ہیں۔ بلاتعطل پیغام رسانی کے لیے سگنل کمپنیاں، تکنیکی مدد کے لیے ای ایم ای کے دستے اور بم ڈسپوزل ا سکواڈ بھی تعینات کیے گئے ہیں۔
اس کے علاوہ۲۵ہزار افراد کے لیے ہنگامی راشن، کیو آر ٹی، ٹینٹ سٹی، واٹر پوائنٹ، بلڈوزر اور کھدائی کرنے والی مشینوں سمیت دیگر سامان کا انتظام کیا گیا ہے ۔ فوج کے ہیلی کاپٹروں کو کسی بھی ناگہانی صورتحال سے نمٹنے کے لیے تیار رکھا گیا ہے ۔
آپریشن شیوا سے۲۰۲۵کی یاترا پر جانے والے تمام عقیدت مندوں کیلئے محفوظ، ہموار اور روحانی طور پر اطمینان بخش سفر کو یقینی بنانے کے واسطے فوج کے پختہ عزم کی عکاسی ہوتی ہے ۔
