ٹریفک چوکی سے ’گوشت‘بر آمد ہونے پر۳ پولیس اہلکار گرفتار

جموں//
اودھم پور ضلع میں چنانی ناشری سرنگ کے قریب تین ٹریفک پولیس اہلکاروں کو ان کی چوکی سے ’مشکوک اشیاء ‘برآمد ہونے کے بعد حراست میں لیا گیا ہے۔
حالانکہ پولیس نے یہ نہیں بتایا کہ یہ مادہ کیا تھا، لیکن منگل کی دیر رات ٹریفک چوکی کے باہر احتجاج کرنے والے مقامی لوگوں نے دعویٰ کیا کہ پولیس اہلکار گوشت پکا رہے تھے۔
اودھم پور کے ایس ایس پی ناگپور امود اشوک نے کہا’’چنانی پولیس کو شکایت ملی تھی کہ کچھ لوگوں نے چنانی،ناشری سرنگ کے قریب ٹریفک پولیس چوکی پر کچھ مشکوک چیزیں دیکھی ہیں‘‘۔
پولیس نے بتایا کہ واقعے کے بعد سیکڑوں افراد موقع پر جمع ہوگئے اور احتجاج کیا۔
پولیس افسر نے کہا’’مشکوک اشیاء کو مجسٹریٹ، ایک ویٹرنری ڈاکٹر اور عوام کے عینی شاہدین کی موجودگی میں ضبط کیا گیا‘‘۔
ایس ایس پی نے کہا کہ نمونے جانچ کے لئے بھیجے گئے ہیں۔انہوں نے مزید کہا کہ رپورٹ کی بنیاد پر کارروائی کی جائے گی۔ (ایجنسیاں)