سری نگر کے بٹہ مالو اور ایچ ایم ٹی میں پولیس کے چھاپے

سرینگر//
پولیس نے تھانہ شیر گڑھی میں درج غیر قانونی سرگرمیاں (روک تھام) ایکٹ کی دفعہ۱۳کے تحت ایک کیس کی تفتیش کے سلسلے میں ہفتے کی صبح سری نگر شہر کے بٹہ مالو اور ایچ ایم ٹی علاقوں میں مختلف مقامات پر تلاشی کارروائیاں انجام دیں۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا’’کچھ افراد کے خلاف تحقیقات جاری ہے جو مخالفین کے کہنے پر اور دوسروں کے ساتھ مل کر مجرمانہ سازش میں ملوث پائے گئے ہیں‘‘۔
بیان میں کہا گیا’’یہ افراد لوگوں کو غیر قانونی اور پر تشدد سرگرمیوں کیلئے اکسانے کیلئے من گھڑت اور غلط معلومات پھیلانے کے ذریعے بدنیتی پر مبنی بیانیہ تیار کرنے کی مہم کو منظم کرنے میں ملوث پائے گئے تھے ‘‘۔
ترجمان نے کہا’’ضلع پولیس سرینگر نے این آئی اے کی ایک عدالت سے سرچ وارنٹ حاصل کرنے کے بعد بونہ پورہ بٹہ مالو کے اویس ریاض ڈار اور ایچ ایم ٹی زینہ کوٹ کے ساحل احمد بٹ کے گھروں کی تلاشی لی‘‘۔
ترجمان نے کہا کہ تلاشی کے دوران مجرمانہ مواد اور الیکٹرانک آلات ضبط کئے گئے ۔ان کا کہنا تھا کہ آنے والے دنوں میں مزید ایسی کارروائیاں انجام دی جائیں گی۔
ترجمان نے بیان شہریوں پر زور دیا کہ وہ سوشل میڈیا پلیٹ فارمز کا استعمال کرتے ہوئے ذمہ داری کا مظاہرہ کریں اور اشتعال انگیز مواد کو شیئر کرنے یا اپ لوڈ کرنے سے گریز کریں جو جھوٹے بیانیے کو فروغ دیتا ہے اور لوگوں خصوصاً نوجوانوں کو دہشت گردی کی کارروائیوں کیلئے گمراہ کرتا ہے ۔