ناراض بی جے پی کارکنوں نے رینا کو تقریر مختصر کرنے پر مجبور کیا

جموں/28 اگست
جموںکشمیر بی جے پی صدر رویندر رینا کو ریاسی ضلع کی شری ماتا ویشنو دیوی سیٹ سے پارٹی لیڈر روہت دوبے کو ٹکٹ نہ دیئے جانے پر ناراض کارکنوں نے بدھ کو اپنی تقریر مختصر کرنے پر مجبور کردیا۔
امیدواروں کی نظر ثانی شدہ فہرست میں دوبے کا نام سابق ایم ایل اے بلدیو راج شرما کے ساتھ شامل کیا گیا تھا۔
رینا کٹرا پہنچے جہاں دوبے کے حامی سڑکوں پر نکل آئے تھے اور ان کی جگہ شرما کو میدان میں اتارنے کے پارٹی کے فیصلے کے خلاف پارٹی کے نئے قائم کردہ دفتر کے باہر شاہراہ کو بند کردیا تھا۔
شری ماتا ویشنو دیوی سیٹ پر25 ستمبر کو دوسرے مرحلے میں 25 دیگر حلقوں کے ساتھ ووٹ ڈالے جائیں گے۔
دریں اثنا جموں کے چھمب حلقہ سے بی جے پی کے مشتعل کارکنوں کے ایک نئے گروپ نے سابق ایم ایل اے راجیو شرما کو وہاں سے میدان میں اتارنے کے خلاف نعرے بازی کی۔
جموں کے تریکوٹا نگر میں پارٹی ہیڈکوارٹر کے باہر جمع ہونے والے کارکنوں نے کہا کہ وہ ٹکٹ حاصل کرنے کے لئے کسی’بیرونی‘ کے بجائے ایک مقامی رہنما کی امید کر رہے ہیں۔
پہلے مرحلے میں 24 سیٹوں پر 18 ستمبر کو ووٹ ڈالے جائیں گے جبکہ آخری اور تیسرے مرحلے میں بقیہ 40 سیٹوں پر یکم اکتوبر کو ووٹ ڈالے جائیں گے جس کے بعد 4 اکتوبر کو ووٹوں کی گنتی ہوگی۔
ریاسی کے لئے بی جے پی کے ضلع صدر دوبے کا نام پیر کو پارٹی کی طرف سے جاری 44 امیدواروں کی ابتدائی فہرست میں تھا جسے بعد میں واپس لے لیا گیا تھا۔ تاہم منگل کو جاری 29 امیدواروں کی فہرست میں پارٹی نے دوبے کی جگہ شرما کا نام لیا ہے جبکہ دیگر تمام نام اسی حلقہ بندی کے لئے یکساں ہیں جن کا پہلے اعلان کیا گیا تھا۔
جموں و کشمیر بی جے پی صدر جیسے ہی پارٹی دفتر پہنچے تو سیکڑوں نعرے بازی کرنے والے کارکنوں نے ان کا استقبال کیا اور دوبے کو ٹکٹ دینے سے انکار کرنے اور ان کی جگہ شرما کو ٹکٹ دینے کی وضاحت کا مطالبہ کیا۔
رینا نے کارکنوں سے خطاب کرتے ہوئے کہا”ہم جانتے ہیں کہ دوبے بی جے پی کا ایک محنتی اور مخلص رکن ہے جس کا خاندان کئی نسلوں سے پارٹی سے جڑا ہوا ہے۔ہم انتخابی موڈ میں ہیں اور ہمیں اپنی پارٹی کے پہلے ملک، پارٹی دوسرے اور آخر میں خود کے مشن کے ساتھ مل کر لڑنا ہے“۔
رینا کی تقریر کو پارٹی کارکنوں کی جانب سے بار بار روکا جاتا رہا اور واضح الفاظ میں جواب طلب کیا گیا کہ دوبے کو ٹکٹ دیا جائے گا یا نہیں۔ جس کے بعد رینا کوجلد ہی اپنی تقریر ختم کرنی پڑی کیونکہ دوبے کے حوالے سے انہیں مطمئن کرنے کی کوششوں کے باوجود پارٹی کارکن کھڑے ہوگئے“۔
بی جے پی یونٹ صدر نے کہا کہ دوبے بی جے پی کے ایک مخلص کارکن ہیں جن کے خاندان کی جن سنگھ کے دنوں سے ہی پارٹی کی حمایت کرنے کی تاریخ رہی ہے۔ وہ ہمیشہ پارٹی کے ساتھ رہیں گے۔
رینا نے بعد میں ایک سوال کے جواب میں نامہ نگاروں کو بتایا کہ دوبے کے بہت سے حامی ان پر حلقہ سے آزاد امیدوار کے طور پر لڑنے کےلئے دباو¿ ڈال رہے ہیں۔
کارکنوں نے دوبے کی مداخلت پر سڑک کی ناکہ بندی کو ہٹا دیا جس نے کہا کہ پارٹی کے فیصلے نے کارکنوں کو مایوس کردیا ہے۔
دوبے کاکہنا تھا” آج میں پارٹی کی وجہ سے ہوں اور سڑک بلاک کرنا اور پھنسے ہوئے ویشنو دیوی یاتریوں سمیت مسافروں کو تکلیف پہنچانا اچھا نہیں ہے۔ مجھے کل تک انتظار کرنے کے لئے کہا گیا ہے“۔انہوں نے کہا کہ سینئر قائدین دہلی سے آرہے ہیں اور ہمیں پارٹی کے فیصلے کے بارے میں پتہ چل جائے گا۔
دوبے نے کہا”مجھے نہیں معلوم کہ پہلی فہرست میں شامل ہونے کے بعد میرا نام کیوں خارج کیا گیا۔ یہ کہنا قبل از وقت ہے کہ میں آگے کیا کروں گا۔ پارٹی کارکن جو بھی فیصلہ کریں گے، میں ان کے فیصلے کا احترام کروں گا“۔
ڈیموکریٹک پروگریسو آزاد پارٹی (ڈی پی اے پی) کے سابق صوبائی صدر جوگل کشور شرما نے بھی دوبے سے ملاقات کی اور کہا کہ وہ میرا چھوٹا بھائی ہے۔
شرما نے کہا”میں فی الحال کسی پارٹی سے وابستہ نہیں ہوں کیونکہ میں نے ڈی پی اے پی چھوڑ دیا ہے۔ جب ان کا نام بی جے پی امیدواروں کی فہرست میں درج کیا گیا تو مجھے ان کے لئے خوشی ہوئی اور انہوں نے ان کے خلاف الیکشن نہ لڑنے کا فیصلہ کیا۔“ (پی ٹی آئی)