پروت مالا پروجیکٹوں کی پیش رفت کو تیز کرنے کی ہدایت

سرینگر///
چیف سیکریٹری اَتل ڈولو نے آج نیشنل ہائی ویز لاجسٹک مینجمنٹ لمیٹڈ (این ایچ ایل ایم ایل) کی ایک میٹنگ منعقد کی جس میں جموںوکشمیر یوٹی میں پروت مالا کے تحت مجوزہ متعدد پروجیکٹوں کی پیش رفت کا جائزہ لیا گیا۔
دورانِ میٹنگ چیف سیکریٹری نے جموں و کشمیر کے مختلف سیاحتی مقامات پر روپ وے منصوبوں کی تعمیر کے سلسلے میں نیشنل ہائی وے لاجسٹک مینجمنٹ لمیٹڈ (این ایچ ایل ایم ایل) کی جانب سے پری فزیبلٹی رِپورٹوں کی عمل درآمد میں پیش رفت کا جائزہ لیا۔
ڈولو نے پی ایس یو پر زور دیاہے کہ وہ اس عمل کو تیز کرے تاکہ تکنیکی طور پر قابل عمل منصوبوںکی پیش رفت کے لئے وضاحت حاصل کی جاسکے۔ اُنہوں نے این او سی کے حصول، فارسٹ کلیئرنس اور کسی بھی جاری منصوبوں کی راہ میں آنے والی یوٹیلٹی شفٹنگ کی صورتحال کا بھی جائزہ لیا۔
چیف سیکریٹری نے سینٹرل باڈی اور متعلقہ محکموں کے درمیان بہتر ہم آہنگی کو اُجاگر کرنے کی ضرورت پر زور دیا تاکہ آنے والے مسائل کو حل کرنے کیلئے ان کے مابین بہتر تفہیم تک رَسائی حاصل کی جاسکے۔
ڈولو نے سانبہ میں ملٹی ماڈل لاجسٹک پارک کے قیام کے کام کو تیز کرنے اور کٹرا ہ میں پبلک ٹرانسپورٹ ٹرمنل اِنفراسٹرکچر (پی ٹی ٹی آئی) کی ترقی کا کام تیز کرنے پر زور دیا۔
میٹنگ کو بنیادی مسائل اور ان کی موجودہ صورتحال پر جانکاری دی گئی۔میٹنگ میں مزید بتایا گیا کہ۱۸ روپ وے منصوبوں میں سے ۳کی پیشگی رپورٹ تیار کی گئی ہے اور مزید ۳ منصوبوں کے لئے مشاورت جاری ہے۔
میٹنگ میں یہ بھی اِنکشاف ہواکہ ان روپ وے منصوبوں میں بال تل۔ امرناتھ گپھا، مخدوم صاحبؒ۔ ہری پربت، بھدرواہ۔سیوجدھار، نشری ٹنل۔سناسر، شنکراچاریہ، سونہ نمرگ۔تھاجیواس کے علاوہ مذہبی یا سیاحتی اہمیت کے حامل دیگر منصوبے شامل ہیں۔
میٹنگ میں سی اِی او این ایچ ایل ایم ایل ،ایڈیشنل چیف سیکرٹری فارسٹ ،پرنسپل سیکرٹری محکمہ زرعی پیداوار، پرنسپل سیکرٹری فائنانس، کمشنر سیکرٹری مکانات و شہری ترقی محکمہ ،صوبائی کمشنر کشمیر و جموں،سیکرٹری آر اینڈ بی، سیکرٹری ریونیو ، ضلع ترقیاتی کمشنر سری نگر ، ضلع ترقیاتی کمشنر رِیاسی ، کمشنر ایس ایم سی، وِی سی ایل سی ایم اے، ایم ڈی جے کے سی سی سی اور دیگر متعلقہ افسران موجود تھے جبکہ آئوٹ سٹیشن اَفسران نے بذریعہ ویڈیو کانفرنسنگ میٹنگ میں حصہ لیا۔