ڈکسم میں گاڑی لڑھک گئی ایک ہی کنبے سے وابستہ ۸؍افراد ہلاک

سرینگر//
جنوبی ضلع اننت ناگ کے ڈکسم کوکر ناگ علاقے میں ہفتے کے روز ایک نجی گاڑی کو حادثہ پیش آیا جس کے نتیجے میں گاڑی میں سوار ایک ہی کنبے سے وابستہ پانچ بچے ، دو خواتین سمیت۸؍افراد جاں بحق ہوئے ہیں۔
اطلاعات کے مطابق ہفتے کے روز ڈکسم کوکر ناگ کے نزدیک ایک گاڑی ڈرائیور کے قابو سے باہر ہو کر گہری کھائی میں جاگری جس کے نتیجے میں گاڑی میں سوار پانچ ، بچے ، دو خواتین سمیت آٹھ افراد کی برسر موقع ہی موت واقع ہوئی۔
حادثے کی اطلاع ملتے ہی پولیس ، مقامی لوگ اور فوجی اہلکار جائے موقع پر پہنچے اور ریسکیو آپریشن شروع کیا تاہم حادثہ اس قدر بھیانک تھا کہ گاڑی میں سوار آٹھ افراد کی موقع پر ہی موت واقع ہوئی تھی۔
نمائندے نے بتایا کہ حادثے میں جاں بحق ہوئے افراد کو پوسٹ مارٹم کی خاطر سب ضلع ہسپتال کوکر ناگ پہنچایا گیا جہاں پر قانونی اور طبی لوازمات پورے کرنے کے بعد لاشیں کشتواڑ روانہ کی گئیں۔
ہلاک شدگان کی شناخت امتیاز احمد راتھر ولد غلام رسول راتھر ساکن کشتواڑ ‘۴۰سالہ افروزہ بیگم زوجہ امتیاز احمد راتھر ساکن کشتواڑ، ۴۰سالہ ریشما زوجہ ماجد احمد ،۱۲سالہ اریبہ امتیاز دختر امتیاز احمد ‘۱۰سالہ آنیا جان دختر امتیاز احمد ‘۶سالہ ابھان امتیاز دختر امتیاز احمد‘۱۶سالہ مسیب ماجد ولد ماجد احمد‘۸سالہ مشال ماجد ولد ماجد احمد کے بطور کی گئی ہے ۔
حادثے میں امتیاز احمد راتھر نامی پولیس اہلکار کی بیوی اور تین بیٹیاں بھی جاں بحق ہوئی ہیں۔
نامہ نگار نے بتایا کہ کشتواڑ میں جوں ہی ایک ہی کنبے کے آٹھ افراد کی حادثے میں موت واقع ہونے کی خبر پھیل گئی تو وہاں کہرام مچ گیا ، خواتین سینہ کوبی کرنے لگیں۔
دریں اثنا پولیس نے حادثے کی وجوہات جاننے کی خاطر کیس درج کرکے مزید تحقیقات شروع کی ہے ۔
ادھرلیفٹیننٹ گورنر منو ج سِنہا نے ڈکسم اننت ناگ میں ہوئے المناک سڑک حادثے پر گہرے دُکھ اِظہار کیا ہے۔
لیفٹیننٹ گورنر نے اَپنے ایک تعزیتی پیغام میںکہا ’’ ڈکسم اننت ناگ میں آج ایک المناک سڑک حادثے میں قیمتی جانوں کے ضیاع کے بارے میں جان کر مجھے بہت دُکھ ہوا ہے ۔ ہم سب دُکھ کی اِس گھڑی میں سوگوار کنبے کے ساتھ ہیں۔میں نے ضلعی اِنتظامیہ کو متاثرہ کنبے کو تمام ضروری مدد فراہم کرنے کی ہدایات جاری کی ہیں۔‘‘