گرمی کے باعث اسکولوں کو بند نہیں کیا جا سکتا ہے :کمار

سرینگر//
محکمہ تعلیم کے پرنسپل سکریٹری ‘آلوک کمار نے ہفتے کے روز شدید گرمی کی وجہ سے اسکول ایک بار پھر بند کرنے کو خارج از امکان قرار دیتے ہوئے کہا کہ تعطیلات میں اضافہ کرنا گرمی کی پریشانیوں سے بچنے کا حل نہیں ہے ۔
کمار نے کہا کہ گرمیوں سے چیلنج پیدا ہوئے ہیں لیکن اسکولی نظام کو برقرار رکھنا بھی ضروری ہے ۔
بتادیں کہ وادی میں جاری شدید گرمیوں کے پیش نظر بعض لوگ اسکولوں میں مزید چھٹیوں کا مطالبہ کر رہے ہیں۔
پرنسپل سکریٹری نے ہفتے کے روز یہاں اس سلسلے میں پوچھے جانے والے ایک سوال کے جواب میں نامہ نگاروں کو بتایا’’ہم سب گرمی جھیل رہے ہیں جب تک گرمی ہے تب تک اسکول بند نہیں رکھے جاسکتے ہیں اس سے نظام بگڑ جائے گا اب سردی شروع ہوگی تو اس میں بھی اسکول بند کرنے پڑتے ہیں‘‘۔
کمار نے کہا’’اسکولوں میں جو کام کاج کا وقت ہے اس کو بہر حال میں چلنے دینا ہے ‘‘۔ان کا کہنا تھا’’یہ کوئی معقول بات نہیں ہے کہ گرمی ہوئی تو اسکولوں کو بند کر دو، اس طرح کے مطالبے کو پورا نہیں کیا جا سکتا ہے ۔ہاں یہ بات ضرور ہے کہ اگر کسی کو گرمی سے دقت ہوتی ہے تو حاضری میں سختی نہیں کی جائے گی لیکن اسکول بند کرنا اس کا کوئی حل نہیں ہے‘‘۔
اسکولوں میں دستیاب سہولیات کے بارے میں پوچھے جانے پر کمار نے کہا کہ اسکولوں میں پینے کے پانی، چھائوں وغیرہ جیسی سہولیات موجود ہیں۔انہوں نے کہا’’ہم ابھی اسکولوں میں ائیر کنڈیشنز لگانے کی پوزیشن میں نہیں ہیں لیکن آگے ان کو لگانے کی کوشش کی جائے گی۔‘‘