انجینئر رشیدکو حلف اٹھانے کا موقع دیاجانا چاہئے:عمر

سرینگر//
نیشنل کانفرنس کے نائب صدر اور سابق وزیر اعلیٰ عمر عبداللہ نے پیر کو حلف اٹھانے والے ارکان پارلیمان کو مبارک باد پیش کرتے ہوئے کہا کہ ہمارے ارکان پارلیمان انجینئر رشید سمیت تمام قیدیوں کیلئے انصاف کا مطالبہ کریں گے ۔
عمر نے کہا کہ یہ ہماری جمہوریت کیلئے ایک اہم موقع ہے ۔
سابق وزیر اعلیٰ نے پیر کو ’ایکس‘پر اپنے ایک طویل پوسٹ میں کہا’’میں جموں کشمیر کی نمائندگی کرنے والوں سمیت تمام ارکان پارلیمان کو مبارکباد پیش کرتا ہوں جو آج حلف اٹھا رہے ہیں‘‘۔
این سی نائب صدر نے کہا کہ آج ہماری جمہوریت کے لئے بہت اہم موقع ہے ۔
عمر کا کہنا تھا’’یہ بات مسلم ہے کہ شمالی کشمیر کے لوگوں نے انجینئر رشید کو منتخب کیا ہے لہذا ان کو حلف اٹھانے کا موقع دیا جانا چاہئے تاکہ وہ اپنے پارلیمانی حلقے کی نمائندگی کر سکے ‘‘۔
سابق وزیر اعلیٰ نے کہا’’ان قیدیوں کے ساتھ ہونے والی نا انصافی کو بھی تسلیم کرنے ضرورت ہے جو انتخابات میں حصہ لینے سے قاصر ہیں یا تیار نہیں ہیں‘‘۔انہوں نے کہا’’ہمارے ارکان پارلیمان انجینئر رشید سمیت قیدیوں کے لئے انصاف کی آواز بلند کریں گے ‘‘۔
این سی نائب صدر کا کہنا تھا’’ہم جموں کشمیر سے باہر کے جیلوں میں بند ان قیدیوں کی فوری رہائی تک واپس کشمیر کی جیلوں میں منتقلی کا مطالبہ بھی کریں گے ‘‘۔
عمر نے کہا کہ ہمارے اہم مطالبات میں۵؍اگست ۲۰۱۹کے بعد حراست میں لئے گئے تمام افراد کے لئے وسیع تر عام معافی ہوگی۔