ایگزٹ پولز منظم کرائے گئے ہیں‘مودی جا رہے ہیں:کانگریس

نئی دہلی//
کانگریس نے ووٹنگ کے سات مرحلوں کی تکمیل کے بعد سامنے آنے والے ایگزٹ پولز کو ایک نفسیاتی کھیل قرار دیتے ہوئے کہا کہ یہ سب منظم ہے اور انڈیا اتحاد۲۹۵سے زیادہ سیٹیں جیت رہا ہے ۔
کانگریس کمیونیکیشن ڈیپارٹمنٹ کے انچارج جئے رام رمیش نے ایگزٹ پولز کے نتائج کے بعد کہا کہ انڈیا اتحاد کی جیت یقینی ہے اور وزیر اعظم نریندر مودی۴جون کو اقتدار سے باہر ہو رہے ہیں۔
مودی کا نام لئے بغیر کانگریس کے لیڈر نے کہا’’جو شخص۴جون کو باہر ہونے والا ہے ، اس نے ان ایگزٹ پولز کو منظم کرایا ہے ۔ انڈیا اتحاد کو یقینی طور پر کم از کم ۲۹۵سیٹیں ملیں گی … ایک واضح اور فیصلہ کن اکثریت‘‘۔
مودی کو سبکدوش ہونے والے وزیر اعظم بتاتے ہوئے انہوں نے کہا’’اس دوران سبکدوش ہونے والے وزیر اعظم تین دن تک آرام سے رہ سکتے ہیں۔ یہ سب نفسیاتی کھیل ہے جس میں انہوں نے مہارت حاصل کر لی ہے لیکن اصل نتائج ان سے بہت مختلف ہوں گے ۔ بدلے گا ہندوستان، انڈیا اتحاد جیتے گا‘‘۔
اس سے پہلے کانگریس صدر ملک ارجن کھڑگے نے دعویٰ کیا ہے کہ انڈیا اتحاد اس عام انتخابات میں کم از کم۲۹۵لوک سبھا سیٹیں جیت رہا ہے ۔
کھڑگے نے آج یہاں اپنی رہائش گاہ پر انڈیا اتحاد کے سرکردہ لیڈروں کی میٹنگ کے بعد نامہ نگاروں کو بتایا کہ اتحاد لیڈروں سے موصول ہونے والی معلومات اور اس کی بنیاد پر کیے گئے تخمینے سے یہ واضح ہوتا ہے کہ انڈیا اتحاد۲۹۵سے زیادہ سیٹیں جیتنا یقینی ہے ۔ انہوں نے کہا کہ انڈیا اتحاد اس سے زیادہ سیٹیں جیت رہا ہے لیکن وہ۲۹۵سے کم سیٹیں نہیں جیت رہا ہے ۔
کانگریس کے صدر نے کہا کہ انڈیا اتحاد کے رہنماؤں کی تقریباً ڈھائی گھنٹے تک جاری رہنے والی میٹنگ میں کئی اہم امور پر تبادلہ خیال کیا گیا۔
اس میٹنگ میں سب سے اہم مسئلہ جو زیر بحث آیا وہ یہ تھا کہ ووٹوں کی گنتی کے دن کیا حکمت عملی اپنائی جائے ۔ اس حوالے سے تمام جماعتوں کے قائدین نے اپنے خیالات کا اظہار کیا۔
کھڑگے نے کہا کہ میٹنگ میں یہ بھی طے کیا گیا ہے کہ انتخابات کے دن کس طرح کی حکمت عملی اپنائی جائے ، اس پر اتحاد کے تمام لیڈروں نے اپنے خیالات کا اظہار کیا ۔ انہوں نے کہا کہ انڈیا اتحاد کی تمام پارٹیاں اپنے کارکنوں کو اس کے لیے تیار کر رہی ہیں۔
میٹنگ میں کھڑگے ، کانگریس کی سینئر لیڈر سونیا گاندھی، راہل گاندھی، کے سی وینوگوپال، پرینکا گاندھی واڈرا، سماج وادی پارٹی کے اکھلیش یادو، رام گوپال یادو، نیشنلسٹ کانگریس پارٹی کے شرد پوار، جتیندر اوہاد، عام آدمی پارٹی کے اروند کیجریوال اور پنجاب کے وزیر اعلیٰ بھگونت مان، سنجے سنگھ، راگھو چڈھا، ڈی ایم کے کے ٹی آر بالو، آر جے ڈی کے تیجسوی یادو، سنجے یادو، جھارکھنڈ مکتی مورچہ کے چمپئی سورین، مسز کلپنا سورین، نیشنل کانفرنس کے فاروق عبداللہ، کمیونسٹ پارٹی آف انڈیا کے ڈی راجا، مارکسی کمیونسٹ پارٹی کے سیتارام یچوری، شیوسینا ادھو گروپ کے انل دیسائی، کمیونسٹ پارٹی آف انڈیا (ایم ایل) کے دیپانکر بھٹاچاریہ اور وی آئی پی کے مکیش ساہنی نے شرکت کی ۔