خراب موسمی صورتحال: آج تمام اسکول بند رہیں گے :صوبائی کمشنر

سرینگر//
صوبائی کمشنر کشمیر وجے کمار بدھوری نے پیر کو کہاکہ خراب موسمی صورتحال کے پیش نظر منگل کے روز وادی کے سبھی اضلاع میں اسکول بند رہیں گے ۔
صوبائی کمشنر نے کہاکہ آج رات آفیسران کو فیلڈ میں تعینات رہنے کے احکامات صادر کئے گئے ہیں۔
سری نگر میں نامہ نگاروں سے بات چیت کے دوران بدھوری نے کہاکہ شمالی ضلع کپواڑہ کے نالہ پہرو میں طغیانی آنے کے باعث وہاں پر سیلابی صورتحال پیدا ہوئی ہے ۔انہوں نے کہاکہ کپواڑہ میں سال ۱۹۹۰کے بعد نالہ پہرو میں پانی کی سطح اتنی بڑھ گئی ۔
صوبائی کمشنر کے مطابق وادی کے دیگر اضلاع میں کوئی سیلابی صورتحال نہیں اور پانی خطرے کے نشان سے کافی نیچے ہے ۔
بدھوری نے کہاکہ جنوبی کشمیر میں نالہ ویشو میں پانی خطرے کے نشان کو چھو گیا لہذا یہاں لوگوں سے اپیل کی گئی ہے کہ وہ محتاط رہے اور ندی نالوں کے نزدیک جانے سے گریز کریں۔
صوبائی کمشنر نے مزید بتایا کہ درمیانی شب سرینگر کے رام منشی باغ میں بھی پانی الرٹ لیول تک پہنچ سکتا ہے تاہم گھبرانے کی کوئی ضرورت نہیں کیونکہ کل سے موسم میں بہتری کا امکان ہے ۔
بدھوری نے بتایا کہ آج رات تمام آفیسران فیلڈ پر تعینات رہیں گے تاکہ کسی بھی ہنگانی صورتحال سے نمٹا جا سکے ۔انہوں نے کہاکہ کل یعنی منگل کے روز سری نگر سمیت وادی کے سبھی اضلاع میں احتیاطی طورپر اسکول بند رہیں گے ۔
صوبائی کمشنر کشمیرنے عوام الناس سے اپیل کی کہ وہ دریاوں اور ندی نالوں کے نزدیک جانے سے احتراز کریں۔
اس دوران مسلسل بارش اور پانی بھرجانے کے پیش نظر وادی میں پیر کو کئی علاقوں میں اسکول بند رہے اور درس و تدریس کا عمل معطل رہا۔
طلباء کی حفاظت کے لئے احتیاطی اقدام کے طور پرپیر کو کپواڑہ ضلع کے تمام اسکولوں میں کلاس کا کام معطل کردیا گیا ۔ تاہم، تدریسی / غیر تدریسی عملہ صورتحال کی نگرانی اور اپنے متعلقہ اداروں کے ادارہ جاتی اثاثوں کی حفاظت کو یقینی بنانے کے لئے اپنے فرائض انجام دیتا رہا۔
اس کے علاوہ دوڈہ ‘رام بن‘بانڈی پورہ اور گریز میں بھی آج درس و تدریس کا عمل معطل رہا ۔
سب ڈویڑن کنگن کے دائرہ اختیار میں آنے والے ہائر سیکنڈری سطح تک کے تمام تعلیمی اداروں میں طلباء کی حفاظت اور فلاح و بہبود کیلئے پیرکو کلاس ورک معطل رہا۔
ادھر موجودہ موسمی حالات کے پیش نظر کشمیر یونیورسٹی نے کل منگل کو ہونے والے تمام امتحانات ملتوی کرنے کا اعلان کیا ہے۔
یونیورسٹی کی جانب سے جاری نوٹیفکیشن میں کہا گیا ہے کہ تمام متعلقہ امیدواروں کی جانکاری کے لئے مطلع کیا جاتا ہے کہ۳۰؍ اپریل کو ہونے والے کشمیر یونیورسٹی کے تمام امتحانات ملتوی کردیئے گئے ہیں۔ نئی تاریخیں جلد ہی جاری کی جائیں گی۔