سرینگر/۳۰مارچ
نیشنل کانفرنس کے نائب صدر اور سابق وزیر اعلیٰ‘ عمر عبداللہ کا کہنا ہے کہ انتخابات میں حصہ لینا یہ نہ لینا ان کا ذاتی فیصلہ نہیں بلکہ پارٹی کا فیصلہ ہوگا۔
عمر نے کہا کہ نیشنل کانفرنس لوک سبھا سیٹوں کےلئے امیدواروں کا اعلان کبھی بھی کر سکتی ہے ۔
سابق وزیر اعلیٰ نے ان باتوں کا اظہار ہفتے کو یہاں نامہ نگاروں کے سوالوں کے جواب دینے کے دوران کیا۔
این سی نائب صدر نے کہا”میں الیکشن لڑوں یا نہ لڑوں اور کہاں سے لڑوں یہ میرا ذاتی فیصلہ نہیں بلکہ پارٹی کا فیصلہ ہوگا“۔ان کا کہنا تھا”تنظیم اگر پسند کرے گی تومجھے منڈیٹ دے سکتی ہے “۔
عمر عبداللہ نے لوک سبھا سیٹوں کےلئے امیدواروں کے اعلان کے بارے میں پوچھے جانے پر کہا”ابھی سجاد لون کے بغیر کسی نے اعلان نہیں کیا ہے ، آپ این سی کے پیچھے ہی کیوں پڑے ہو“۔انہوں نے کہا”ممکن ہے کہ نیشنل کانفرنس نوٹیفکیشن جاری ہونے کے بعد امیدواروں کا اعلان کرے گی یا ایسا بھی ہوسکتا ہے کہ ہم کاغذات نامزدگی دائر کرنے کے آخری دن امید واروں کا اعلان کریں گے “۔
ان کا کہنا تھا کہ انتخابات کے دوران افواہوں کا بازار ہمیشہ گرم رہتا ہے اور آج یہاں ایسا ہی ماحول ہے ۔
