سرینگر/۱۴مارچ
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر جمعرات کی دو پہر کو ٹریفک کی جزوی نقل و حمل بحال کر دی گئی۔
حکام کا کہنا ہے کہ قومی شاہراہ پر پہلے درماندہ گاڑیوں کو ہی چلنے کی اجازت ہے ۔
انہوں نے لوگوں سے اپیل کی کہ وہ قومی شاہراہ مکمل طور پر بحال تک اس پر سفر کرنے سے گریز کریں۔
جموں وکشمیر ٹریفک پولیس نے’ایکس‘پر ایک پوسٹ کے ذریعے جانکاری فراہم کرتے ہوئے کہا”قومی شاہراہ پر ٹریفک کی جزوی نقل و حمل بحال کردی گئی ہے اور پہلے درماندہ بڑی گاڑیوں کو چلنے کی اجازت ہے “۔
ترجمان نے مزید کہا”لوگوں سے اپیل ہے کہ وہ قومی شاہراہ مکمل طور پر بحال تک اس پر سفر کرنے سے گریز کریں اور شاہراہ کے تازہ اپ ڈیٹ کے لئے ٹریفک کنٹرول یونٹ رام بن کے ساتھ رابطہ کریں“۔
قبل ازیں جموںکشمیر ٹریفک پولیس نے کہا کہ قومی شاہراہ پر ناشری سے بانہال کے درمیان،مہار، گانگرو، موم پسی، نورو نچھلانہ اور کشتواڑی پتھر پر چٹانیں اور مٹی کے تودے کھسک آنے کی وجہ سے ٹریفک کی نقل و حمل بند ہے ۔
انہوں نے کہا کہ قومی شاہراہ پر ٹریفک بند ہونے سے ڈھلواس اور بانہال کے درمیان ہزاروں گاڑیاں درماندہ ہوئی ہیں۔ان کا کہنا ہے کہ قومی شاہراہ پر بحالی کا کام جاری ہے ۔
دریں اثنا جنوبی کشمیر کے ضلع شوپیاں کو صوبہ جموں کے پونچھ اور راجوری کے ساتھ جوڑنے والا تاریخی مغل روڈ اور سرینگر، لیہہ شاہراہ پر ٹریفک مسلسل بند ہے ۔
علاوہ ازیں بھدرواہ چمبہ روڈ اور کشتواڑ، سنتھن ‘ اننت ناگ روڈ بھی مسلسل ہے۔
