سرینگر/29اکتوبر
جموں کشمیر کی گرمائی راجدھانی سری نگر کے عید گاہ علاقے میں اتوار کی سہ پہر ملی ٹینٹوں نے پولیس انسپکٹر پر فائرنگ کی جس کے نتیجے میں وہ شدید طورپر زخمی ہوا اور اس سے علاج ومعالجہ کی خاطر نزدیکی ہسپتال منتقل کیا گیا۔
اطلاعات کے مطابق اتوار کی سہ پہر پائین شہر کے عید گاہ علاقے میں اس وقت سنسنی کا ماحول پھیل گیا اور لوگ محفوظ مقامات کی اور بھاگنے لگے جب مشتبہ ملی ٹینٹوں نے انسپکٹر مسرور احمد پر فائرنگ کی جس کے نتیجے میں وہ خون میں لت پت ہوا۔
معلوم ہوا ہے کہ آ س پاس موجود لوگوں نے زخمی پولیس آفیسر کو علاج ومعالجہ کی خاطر صورہ میڈیکل انسٹی چیوٹ منتقل کیا جہاں پر اس کی حالت تشویشناک بنی ہوئی ہے ۔
حملے کی اطلاع ملتے ہی پولیس اور پیرا ملٹری فورسز کے آفیسران جائے موقع پر پہنچے اور آس پاس علاقوں کومحاصرے میں لے کر حملہ آوروں کی بڑے پیمانے پر تلاش شروع کی۔
ذرائع کا کہنا ہے کہ پستول بردار ملی ٹینٹ نے پولیس آفیسر پر نزدیک سے گولیاں چلائیں اور بعدازاں وہاں سے راہ فرار اختیار کی۔
دریں اثنا جموں وکشمیر پولیس نے ایکس پر جانکاری فراہم کرتے ہوئے بتایا کہ عید گاہ سری نگر میں دہشت گردوں نے پولیس انسپکٹر مسرور احمد پر فائرنگ کی جس کے نتیجے میں وہ زخمی ہوا ہے ۔انہوں نے بتایا کہ ابتدائی تحقیقات کے دوران معلوم ہوا ہے کہ ملی ٹینٹوں نے پستول کا استعمال کیا۔
پولیس ترجمان کے مطابق سیکورٹی فورسز نے ایک وسیع علاقے کو محاصرے میں لے کر فرار ہونے کے راستوں پر پہرے بٹھا دئے ہیں۔
اس سلسلے میں مزید تفصیلات کا انتظار ہے ۔
