حج۱۴۴۴ھ:عازمین حج کا پہلا قافلہ سرینگر ہوائی اڈے پر پہنچا

سرینگر/۱۸جولائی
فریضہ حج کی ادائیگی کے بعد جموںکشمیر سے تعلق رکھنے والے حجاج کرام کی وطن واپسی کا سلسلہ شروع ہوا۔
سرکاری ذرائع کے مطابق منگل کی صبح عازمین حج کا پہلا قافلہ سرینگر ہوائی اڈے پر پہنچا۔انہوں نے کہا کہ فریضہ حج کی ادائیگی کے بعد منگل کے روز۶۳۰عازمین پر مشتمل پہلا قافلہ سعودی عرب سے دو پروازوں میں سری نگر ہوائی اڈے پر پہنچا۔
سعودی عرب سے سرینگر کیلئے حج پروازیں۲؍اگست تک جاری رہیں گی۔
سری نگر ہوائی اڈے پر پہنچنے پر صوبائی کمشنر کشمیر وجے کمار بدھوری، ضلع مجسٹریٹ بڈگام اشوک لبرو اور پولیس و سول انتظامیہ کے اعلیٰ عہدیداروں کے علاوہ نیشنل کانفرنس کے صدر ڈاکٹر فاروق عبداللہ، رکن پارلیمان حسنین مسعودی نے حجاج کرام کا پرتپاک استقبال کیا۔
اس موقع پر ڈاکٹر فاروق عبداللہ نے کہا’’مجھے خوشی ہوئی حاجی صاحبان فریضہ ادائیگی کے بعد اپنے گھر واپس پہنچے ‘‘۔ان کا مزیدکہنا تھا’’مجھے امید ہے کہ ان کی دعائوں سے ملک اور ریاست کو فائدہ ہوگا‘‘۔
سرینگر ہوائی اڈے پر حجاج کرام کے احباب و اقارب کی بڑی تعداد جمع تھی جو اپنے رشتہ دار حاجی صاحبان سے بغلگیر ہو رہے تھے ۔
دریں اثنا متعلقہ حکام نے عازمین حج کی واپسی کیلئے تمام تر انتظامات کئے ہوئے ہیں۔
قابل ذکر ہے کہ امسال جموں و کشمیر سے۱۲ہزار۶۷عازمین حج کیلئے روانہ ہوئے تھے جن میں۶۶۹۸مرد‘۵۳۶۹ خواتین شامل تھیں۔ علاوہ ازیں اس سال۱۱۱ خواتین نے بغیر محرم کے فریضہ حج انجام دیا۔