کچھ لوگوں کو کشمیر کا امن ہضم نہیں ہو تا ہے :ایل جی سنہا

اننت ناگ/۱۵ مئی

جموں و کشمیر کے لیفٹیننٹ گورنر منوج سنہا نے پیر کو کہا کہ تقریباً ۵۰۰ سے۱۰۰۰ لوگوں کو حکومت کے ٹھیکے صرف سابقہ ریاست کو برباد کرنے کے لیے ملتے تھے لیکن ان کا وقت ختم ہوچکا ہے کیونکہ موجودہ انتظامیہ ہر ایک کی خدمت کرنے اور سننے کے لیے پرعزم ہے۔

ایل جی نے ڈورو، اننت ناگ میں کسان سمپرک ابھیان سے خطاب کرتے ہوئے کہا ہے کہ جموں و کشمیر پر حکمرانی اور بربادی کے لیے تقریباً ۵۰۰ یا۱۰۰۰ لوگوں نے ٹھیکے حاصل کیے تھے۔

سنہا کاکہنا تھا”اب ان کا وقت ختم ہو گیا ہے۔ موجودہ انتظامیہ UT کے ہر ایک شہری کی بات سننے اور ان کے مسائل کو حل کرنے کے لیے پرعزم ہے۔ ہم یہاں بغیر کسی امتیاز کے جموں و کشمیر کے 1.30 کروڑ لوگوں کی خدمت کرنے کے لئے ہیں۔انہوں نے مزید کہا کہ کچھ لوگ جموں و کشمیر میں امن اور ترقی کو ہضم نہیں کر سکتے۔

ایل جی نے کسی کا نام لیے بغیر کہا ”کشمیر میں امن اور ترقی دیکھ کر کچھ لوگوں کے پیٹ میں درد ہوتا ہے۔ میں ان کی مدد نہیں کر سکتا،“ ۔

سنہا نے کہا کہ کشمیری مصنوعات جلد ہی قومی اور بین الاقوامی منڈیوں تک پہنچ جائیں گی۔ ”وہ وقت دور نہیں جب کسان کا بیٹا بھی کسان بننا چاہے گا جس طرح سرکاری افسر کا بیٹا افسر بننے کا خواب دیکھتا ہے“۔ انہوں نے مزید کہا کہ کسانوں کو جدید راستے فراہم کیے جائیں گے تاکہ وہ بھی بڑے خواب دیکھ سکیں۔