سری نگر لہیہ شاہراہ پر زوجیلا کے مقام پر برفانی تودا گر آیا

سرینگر/۸مئی
سرینگر لہیہ شاہراہ پر زوجیلا کے مقام پر پیر کی سہ پہر ایک بھاری برکم برفانی تودے کی زد میں دو گاڑیاں آئیں تاہم اس دوران کسی کے زخمی ہونے کے بارے میں کوئی اطلاع موصول نہیں ہوئی۔
سرکاری ذرائع نے بتایا کہ زوجیلاپاس پر کل رات سے ہی برف و باراں کا سلسلہ جاری ہے اور پیر کی سہ پہربھاری برکم برفانی تودے کے نیچے دو گاڑیاں آئیں۔انہوں نے بتایا کہ آس پاس موجود عملے نے فوری طورپر ریسکیو آپریشن شروع کیا اور مسافروں کو بحفاظت باہر نکالا گیا ۔
ایک سینئر عہدیدار نے یو این آئی کو بتایا کہ زوجیلا کے نزدیک برفانی تودا گر آنے کے باعث شاہراہ کو دو طرفہ ٹریفک کیلئے بند کردیا گیا۔
عہدیدار نے مزید کہاکہ خراب موسمی صورتحال کی وجہ سے شاہراہ کو قابل آمدورفت بنانے میں دقتوں کا سامنا کرنا پڑرہا ہے ۔