فوج کسی بھی چیلنج سے نمٹنے کیلئے ہمیشہ تیار ہے‘سربراہ شمالی کمان

جموں//
شمالی فوج کے کمانڈر‘ لیفٹیننٹ جنرل‘ اپیندر دویدی نے جمعرات کو کہا کہ فوج کسی بھی چیلنج سے نمٹنے کیلئے ہمیشہ تیار ہے اور قومی سرحدوں کی سالمیت کو یقینی بنانے میں کوئی کسر نہیں چھوڑے گی۔
فوج نے یہاں ایک بیان میں کہا کہ لیفٹیننٹ جنرل دیویدی شمالی کمان میں ایک تقریب سے خطاب کر رہے تھے۔
بیان میں کہا گیا ہے کہ جنرل آفیسر کمانڈنگ انچیف، ناردرن کمانڈ کی زیر صدارت تقریب میں ۶۶؍ ایوارڈ یافتہ افراد نے بہادری اور ممتاز خدمات کے اعزازات حاصل کیے۔
بیان میں کہا گیا کہ اس میں ۴۹ سینا میڈل (بہادری)، ایک بار ٹو سینا میڈل (گیلنٹری)، ایک یودھ سیوا میڈل، ممتاز خدمات کیلئے چار سینا میڈل‘۱۰ وششٹ سیوا میڈل اور ایک بار ٹو وششٹ سیوا میڈل شامل ہیں۔
فوج نے کہا کہ کل ۳۳؍ افسران، تین جونیئر کمیشنڈ افسران اور ۲۹دیگر رینکوں کو بہادری کے مختلف کاموں اور ممتاز خدمات کے لیے نوازا اور تسلیم کیا گیا۔
ایک سینا میڈل (بہادری) رائفل مین حسین خان، جو ایک آپریشن میں زخمی ہونے کے بعد کوما میں ہیں، ان کے والد کی جانب سے وصول کیا گیا۔
لیفٹیننٹ جنرل دویدی نے تمام ایوارڈ حاصل کرنے والوں کو ان کی نمایاں بہادری اور فرض کے تئیں لگن کیلئے مبارکباد دی اور تمام حاضرین سے ان کی کامیابیوں کی تقلید کرنے کی اپیل کی۔
فوجی کمانڈر نے سرحدوں کے ساتھ انتہائی مشکل حالات پر بھی روشنی ڈالی اور اس بات کا اعادہ کیا کہ ہندوستانی فوج کسی بھی چیلنج سے نمٹنے کیلئے ہمیشہ تیار ہے اور پرامن داخلی سلامتی کی صورتحال اور قومی سرحدوں کی سالمیت کو یقینی بنانے میں کوئی کسر نہیں چھوڑے گی۔ (ایجنسیاں)