اراضی اور ملازمتوں میںآئینی تحفظات کی مانگ

سرینگر/۳۱جنوری (ڈیسک)
مرکز کے زیر انتظام خطہ لداخ میں منگل کے روز خطے میں رہائش پذیر پشتینی باشندوں کیلئے ملازمتوں کو مختص رکھنے اور زمین کیلئے آئینی تحفظات کی مانگ کرنے کیلئے ریلی کا انعقاد کیا گیا۔
اس حوالے سے سماجی کارکن‘ سجاد کرگلی کا کہنا تھا ’’لداخ کے نامور ماہر تعلیم سونم وانگچوک کے بیان کے بعد گزشتہ روز لیہہ اپیکس باڑی اور کرگل ڈیموکریٹک الائنس نے آج (۳۱جنوری) ایک بڑے جلسے کے انعقاد کی کال دی تھی۔ جس کے پیش نظر لداخ کے ہر مکتبہ فکر سے تعلق رکھنے والے افراد نے اس ریلی میں حصہ لیا۔‘‘
کرگلی نے کہا کہ لداخ کے باشندے ملازمتوں اور زمین کیلئے آئینی تحفظات کی مانگ کر رہے ہیں۔
مظاہرین نے دعویٰ کیا کہ ’’مرکزی سرکار لداخ خطے کی شناخت اور ثقافت کو بچانے میں ناکام رہی ہے۔‘‘
وہیں وانگچک، لداخ کے ماحول کے تحفظ کے لیے بھوک ہڑتال پر ہیں اور لیہہ اپیکس باڈی اور کرگل ڈیموکریٹک الائنس کے چار نکاتی ایجنڈے کی تکمیل کا مطالبہ کر رہے ہیں جس میں لداخ کے لیے چھٹے شیڈول کا نفاذ بھی شامل ہے۔
میڈیاسے اپنے خطاب میں وانگچوک نے وزیر اعظم اور وزیر داخلہ سے اپیل کی کہ وہ لداخ کی قیادت کے ساتھ ذاتی طور پر لداخی عوام کے مطالبات کے حل کیلئے بات چیت شروع کریں۔ لیہہ ایپکس باڈی اور کرگل ڈیموکریٹک الائنس دونوں نے سونم وانگچوک کے بیان کا خیرمقدم کیا ہے۔