ایجنسیز
سرینگر؍۶جون
عوامی امن و امان اور سلامتی کو برقرار رکھنے کے لیے ایک اہم کارروائی کے تحت بارہمولہ پولیس نے جموں و کشمیر پبلک سیفٹی ایکٹ کے تحت ایک خاتون کو حراست میں لے لیا ہے۔
پولیس کے مطابق حسینہ بیگم زوجہ محمد یوسف بٹ، ساکن شیری بارہمولہ، کے خلاف متعدد غیر قانونی اور مبینہ طور پر ملک مخالف سرگرمیوں سے متعلق مقدمات درج تھے، جن کی بنیاد پر یہ کارروائی عمل میں لائی گئی۔
پولیس ترجمان نے بتایا کہ ضلع مجسٹریٹ بارہمولہ کی جانب سے جاری کردہ حراستی حکم نامے کے تحت خاتون کے خلاف کارروائی کی گئی۔ انہوں نے کہا کہ مذکورہ خاتون مختلف اضلاع میں درج کئی فوجداری مقدمات میں مطلوب تھی۔
حکم نامے پر عمل درآمد کرتے ہوئے پولیس نے خاتون کو احتیاطی حراست میں لے کر ضلع جیل بھدرواہ منتقل کر دیا۔
پولیس ترجمان نے کہا کہ جموں و کشمیر پولیس امن و سلامتی کے قیام کے لیے اپنی وابستگی کا اعادہ کرتی ہے اور عوامی امن و امان اور سلامتی کے لیے خطرہ بننے والی سرگرمیوں میں ملوث افراد کے خلاف سخت قانونی کارروائیاں آئندہ بھی جاری رہیں گی۔
