پہلگام کے ہوٹلوں میں بھی بڑے پیمانے پر نارکو چھاپے:پولیس
ایجنسیز
سرینگر؍۵ جون
جموں و کشمیر میں منشیات کے خلاف جاری مہم کے تحت سری نگر پولیس نے مبینہ منشیات فروشوں کی چار کروڑ روپے سے زائد مالیت کی منقولہ اور غیر منقولہ جائیدادیں ضبط کر لی ہیں، جبکہ اننت ناگ پولیس نے پہلگام سب ڈویژن کے مختلف ہوٹلوں میں بڑے پیمانے پر نارکو چھاپے مارے ہیں۔
پولیس حکام کے مطابق یہ کارروائیاں ’’نشہ مکت جموں و کشمیر ابھیان‘‘ کے تحت جاری انسدادِ منشیات مہم کا حصہ ہیں۔
پولیس ترجمان نے بتایا کہ لال بازار پولیس اسٹیشن نے این ڈی پی ایس ایکٹ کی دفعہ۶۸؍ایف کے تحت سکھ باغ، لال بازار کے رہائشی عادل احمد ڈوبی کی ملکیت دو منزلہ رہائشی عمارت، جو نو مرلہ اراضی پر تعمیر کی گئی ہے، ضبط کر لی۔ کارروائی کے دوران عادل احمد ڈوبی سے منسلک ایک گاڑی بھی تحویل میں لی گئی۔
اسی طرح لال بازار پولیس نے ہاکہ بازار کے رہائشی ارشد احمد شیخ کی ملکیت ایک گاڑی کو بھی این ڈی پی ایس ایکٹ کی دفعہ۶۸؍ایف کے تحت ضبط کیا۔
دوسری جانب خان یار پولیس اسٹیشن نے تنگ باغ، خان یار کے رہائشی اویس حسین کی دو منزلہ رہائشی عمارت اور ۱۲مرلہ اراضی کو ضبط کر لیا، جس کی مالیت تقریباً دو کروڑ روپے بتائی جاتی ہے۔پولیس کے مطابق اویس حسین این ڈی پی ایس ایکٹ کی دفعات۸‘۲۰؍۲۹ کے تحت درج ایک مقدمے میں نامزد ملزم ہے۔
تحقیقات کے دوران مذکورہ جائیداد کو منشیات کی غیر قانونی تجارت سے حاصل شدہ آمدنی سے خریدی گئی ملکیت قرار دیا گیا، جس کے بعد تمام قانونی تقاضے مکمل کرتے ہوئے اسے ضبط کر لیا گیا۔
پولیس ترجمان نے کہا کہ ضبط کی گئی جائیدادوں اور گاڑیوں کی مجموعی مالیت چار کروڑ روپے سے تجاوز کرتی ہے، جو ضلع میں سرگرم منشیات کے نیٹ ورکس کے مالی ڈھانچے کو تباہ کرنے کی کوششوں میں ایک اہم پیش رفت ہے۔
دریں اثنا، منشیات کی اسمگلنگ اور نشہ آور اشیاء کے استعمال کے خلاف ایک بڑی کارروائی کے تحت اننت ناگ پولیس نے جمعہ کے روز پہلگام سب ڈویژن کے متعدد ہوٹلوں میں وسیع پیمانے پر نارکو چھاپے مارے۔
یہ کارروائی ماوورہ، رافٹنگ پوائنٹ اور یانر علاقوں میں ایس ڈی پی او پہلگام کی نگرانی میں تشکیل دی گئی چھ خصوصی پولیس ٹیموں نے انجام دی۔
پولیس کے مطابق مصدقہ اطلاعات کی بنیاد پر مختلف ہوٹلوں کی تلاشی لی گئی تاکہ سیاحتی رہائش گاہوں کو منشیات سے متعلق سرگرمیوں کے لیے استعمال ہونے سے روکا جا سکے اور علاقے میں سرگرم منشیات فروش نیٹ ورکس پر کڑی نظر رکھی جا سکے۔
پولیس نے کہا کہ یہ چھاپے منشیات کے بڑھتے ہوئے رجحان پر قابو پانے اور مقامی آبادی کے ساتھ ساتھ سیاحوں کے لیے محفوظ ماحول کو یقینی بنانے کی جاری مہم کا حصہ ہیں۔
اننت ناگ پولیس نے ایک بار پھر منشیات سے پاک معاشرے کے قیام کے عزم کا اعادہ کرتے ہوئے کہا کہ ضلع بھر میں ایسی پیشگی اور مؤثر کارروائیاں مستقبل میں بھی جاری رہیں گی تاکہ منشیات فروش نیٹ ورکس کا خاتمہ کیا جا سکے اور نشہ آور اشیاء کے پھیلاؤ کو روکا جا سکے۔
