انڈیا اتحاد کے۸جون کے اجلاس
میں شرکت کریں گے:فاروق
سرینگر؍۵ جون
نیشنل کانفرنس کے صدر ڈاکٹر فاروق عبداللہ نے جمعہ کو کہا کہ ان کی جماعت۸ جون کو نئی دہلی میں منعقد ہونے والے انڈیا اتحاد کے اجلاس میں شرکت کرے گی۔
سری نگر کے حضرت بل علاقے میں نامہ نگاروں سے گفتگو کرتے ہوئے فاروق عبداللہ نے کہا کہ نیشنل کانفرنس اس اتحاد کا حصہ ہے اور اجلاس میں اپنی نمائندگی یقینی بنائے گی۔
فاروق نے کہا، ’’اجلاس ہونے جا رہا ہے۔ عمر (عبداللہ) یا میں، ہم دونوں میں سے کوئی ایک وہاں جائے گا۔ ظاہر ہے ہم اس اتحاد کا حصہ ہیں اور اجلاس میں موجود رہیں گے۔‘‘
اپوزیشن لیڈر سنیل شرما کے اس بیان کے بارے میں پوچھے جانے پر کہ دفعہ۳۷۰ کو ’’دفن‘‘ کر دیا گیا ہے، فاروق عبداللہ نے کہا کہ نیشنل کانفرنس جموں و کشمیر کی خصوصی حیثیت کے مسئلے کو ہمیشہ زندہ رکھے گی۔
سابق وزیر اعلیٰ جموں و کشمیر نے کہا، ’’جس دن ہم سب کشمیر میں دفن ہو جائیں گے، اسی دن دفعہ۳۷۰ بھی دفن ہوگی۔‘‘
فاروق نے زور دے کر کہا کہ نیشنل کانفرنس جموں و کشمیر کی خصوصی شناخت اور حقوق کے تحفظ کے مطالبے سے دستبردار نہیں ہوگی۔
قابل ذکر ہے کہ نیشنل کانفرنس نے بدھ کے روز اعلان کیا تھا کہ اس کے اراکین اسمبلی ریاستی درجے کی بحالی اور خصوصی حیثیت کی واپسی کے مطالبے کے حق میں نئی دہلی میں احتجاج کریں گے۔(ایجنسیاں)
۔۔۔۔۔
