تعلیم کے شعبے میں پنجاب بنا ملک میں نمبر ون : کیجریوال

نئی دہلی، 04 جون (یو این آئی) عام آدمی پارٹی (عآپ) کے قومی کنوینر اروند کیجریوال نے بھگونت مان حکومت کی تعریف کرتے ہوئے کہا ہے کہ محض چار سال میں ہی تعلیم کے شعبے میں پنجاب کو نمبر ون بنا دیا۔
مسٹر کیجریوال نے جمعرات کو کہا کہ سرکاری اسکولوں کی تعلیم میں کبھی 27ویں نمبر پر رہنے والا پنجاب آج پہلے نمبر پر پہنچ گیا ہے۔ یہ سروے مرکزی حکومت کے نیتی آیوگ کا ہے، جس کے مطابق پنجاب نے کیرالہ کو بھی پیچھے چھوڑ دیا ہے۔ دہلی میں تعلیمی انقلاب کے بعد اب پنجاب کے سرکاری اسکولوں میں بھی تاریخی تبدیلی ہو رہی ہے۔ انہوں نے مان حکومت کی تعریف کرتے ہوئے کہا کہ یہ وزیر اعلیٰ بھگونت مان کی بڑی کامیابی ہے کہ محض چار سال میں ہی تعلیم کے شعبے میں پنجاب کو نمبر ون بنا دیا۔ آج پنجاب کے تعلیمی نظام میں زبردست خود اعتمادی آنے کی وجہ سے سرکاری اسکولوں کے بچے نیٹ اور جے ای ای پاس کر رہے ہیں۔ انہوں نے کہا کہ پنجاب پورے ملک میں تعلیم کے شعبے میں پہلے نمبر پر آیا ہے۔ یہ ہمارا سروے نہیں ہے، بلکہ مرکزی حکومت کے نیتی آیوگ کا ایجوکیشن سروے ہے۔ سال 2020 کے سروے میں پنجاب 27ویں نمبر پر تھا لیکن ہماری حکومت بننے کے بعد محض چار سال میں یہ 27ویں نمبر سے پہلے نمبر پر پہنچ گیا ہے۔ یہ بہت بڑی کامیابی ہے۔
مسٹر کیجریوال نے کہا، "عآپ سب سے زیادہ ترجیح تعلیم اور صحت کے شعبے کو دیتی ہے۔ پہلے ہماری دہلی میں حکومت تھی، وہاں بھی ہم نے تعلیم میں بہت اچھا کام کیا۔ اب ہماری پنجاب میں حکومت ہے اور وہاں بھی ہم بچوں کو اچھی تعلیم دینے کی پوری کوشش کر رہے ہیں۔ میں یہ نہیں کہہ رہا کہ سب کچھ اچھا ہو گیا ہے، ابھی کام جاری ہے۔ سرکاری اسکولوں میں پڑھنے والے بچے اب نیٹ اور جے ای ای پاس کر رہے ہیں۔ اس بار بہت سے بچوں کا انتخاب نیٹ اور جے ای ای میں ہوا ہے۔ سرکاری اسکولوں میں پڑھنے والے غریبوں کے بچے اب ڈاکٹر اور انجینئر بن رہے ہیں، جسے دیکھ کر بہت خوشی ہوتی ہے۔ حکومتوں کا یہی تو کام ہوتا ہے۔”