پولیس کا بڑی تعداد میں ایل پی جی سلنڈر ضبط کرنے کا دعویٰ
ایجنسیز
گاندربل؍۴جون
گاندربل پولیس نے ایل پی جی سلنڈروں کی غیر قانونی ذخیرہ اندوزی اور مبینہ بلیک مارکیٹنگ کے خلاف ایک بڑی کارروائی انجام دیتے ہوئے نونر ٹکیہ علاقے میں تلاشی مہم کے دوران گھریلو اور تجارتی گیس سلنڈروں کی بڑی کھیپ ضبط کر لی، جو مبینہ طور پر بغیر کسی قانونی اجازت کے ذخیرہ کیے گئے تھے۔
سرکاری ذرائع کے مطابق پولیس کو علاقے میں ایل پی جی سلنڈروں کی غیر قانونی ذخیرہ اندوزی کے بارے میں مخصوص اطلاع موصول ہوئی تھی، جس کے بعد تلاشی کارروائی عمل میں لائی گئی۔ کارروائی کے دوران مختلف کمپنیوں کے گیس سلنڈر جاوید احمد صوفی ولد نونر ٹکیہ کے احاطے سے برآمد کیے گئے، جو مبینہ طور پر مطلوبہ لائسنس یا اجازت نامے کے بغیر ذخیرہ کیے گئے تھے۔
ضبط شدہ سلنڈروں کو محکمہ امورِ صارفین و عوامی تقسیم کے افسران کی موجودگی میں تمام قانونی کارروائی مکمل کرنے کے بعد موقع پر ہی تحویل میں لے لیا گیا۔
پولیس کے مطابق اتنی بڑی مقدار میں ایل پی جی سلنڈروں کی غیر مجاز ذخیرہ اندوزی نہ صرف قانون کی خلاف ورزی ہے بلکہ حادثات اور دھماکوں کے ممکنہ خطرات کے باعث عوامی سلامتی کے لیے بھی سنگین خطرہ بن سکتی ہے۔
اس سلسلے میں پولیس اسٹیشن گاندربل میں ایک ایف آئی آر درج کی گئی ہے۔ مقدمہ لازمی اشیاء ایکٹ کی متعلقہ دفعات اور بھارتیہ نیائے سنہتا کی دفعہ۲۸۷کے تحت درج کیا گیا ہے۔
حکام کے مطابق معاملے کی مزید تحقیقات جاری ہیں تاکہ مبینہ غیر قانونی سرگرمیوں کے دائرہ کار کا تعین کیا جا سکے اور اس میں ملوث دیگر افراد کی نشاندہی بھی کی جا سکے۔
گاندربل پولیس نے عوامی سلامتی کو خطرے میں ڈالنے اور ضروری اشیاء کی فراہمی میں خلل پیدا کرنے والی سرگرمیوں کے خلاف سخت کارروائی جاری رکھنے کے عزم کا اعادہ کیا ہے۔
پولیس نے شہریوں سے بھی اپیل کی ہے کہ وہ ذخیرہ اندوزی، بلیک مارکیٹنگ یا کسی بھی غیر قانونی سرگرمی کی اطلاع فوری طور پر نزدیکی پولیس تھانے کو دیں۔
