’ گاندھی نے قوم کو سچائی، عدم تشدد، خدمت، قربانی، محبت کا فلسفہ دیا ‘
ڈی آئی پی آر
جموں؍ یکم مئی
جموں کشمیر کے لوک بھون میں گجرات اور مہاراشٹر کے یومِ تاسیس کو نہایت جوش و خروش کے ساتھ منایا گیا، جس میں لیفٹیننٹ گورنر منوج سنہا نے شرکت کی۔
اپنے خطاب میں لیفٹیننٹ گورنر نے کہا کہ گجرات اور مہاراشٹر ملک کی ترقی کے محرک ہیں اور نہ صرف جی ڈی پی اور برآمدات میں ان کا بڑا حصہ ہے بلکہ ان کی سماجی، ثقافتی اور روحانی وراثت بھی بے مثال ہے۔
سنہا نے کہا’’گجرات کی سرزمین کاروباری جذبے، سادگی اور گرمجوشی کے لیے جانی جاتی ہے، جبکہ مہاراشٹر اپنی صنعت، بہادری اور روحانی عظمت کے باعث عالمی سطح پر احترام رکھتا ہے۔ میں دونوں ریاستوں کو بھارت کی ترقی کو آگے بڑھانے والے انجن سمجھتا ہوں‘‘۔
لیفٹیننٹ گورنر نے کہا کہ گجرات کی تاریخ عظیم شخصیات سے بھری ہوئی ہے جنہوں نے ملک کا وقار بلند کیا، جن میں مہاتما گاندھی، سردار ولبھ بھائی پٹیل اور وزیر اعظم نریندر مودی شامل ہیں، جنہوں نے عزم، ایثار اور خود اعتمادی کے ذریعے ملک کی تقدیر بدل دی۔
سنہا نے کہا کہ مہاتما گاندھی نے قوم کو سچائی، عدم تشدد، خدمت، قربانی، محبت اور برداشت کا فلسفہ دیا اور تحریک آزادی کو عوامی تحریک میں بدل دیا۔ انہوں نے مزید کہا کہ گاندھی جی کی زندگی ہمیں ہر مشکل میں اصولوں پر قائم رہنے کی ترغیب دیتی ہے۔
لیفٹیننٹ گورنر نے کہا کہ دنیا کی سب سے بڑی جمہوریت ہونے کا فخر سردار پٹیل کے نظریات اور وژن کا نتیجہ ہے۔انہوں نے کہا’’تنوع میں اتحاد کا ان کا یقین ہماری سب سے بڑی طاقت ہے، جو ‘ایک بھارت، شریشٹھ بھارت’ کے عزم کی عکاسی کرتا ہے‘‘۔
سنہا نے مہاراشٹر کو صنعت، روحانیت، خدمت اور قربانی کی سرزمین قرار دیتے ہوئے کہا کہ چھترپتی شیواجی مہاراج، پیشوا باجی راؤ، بال گنگا دھر تلک اور وینایک دامودر ساورکر جیسی شخصیات نے قومی اتحاد کے لیے اپنی زندگیاں وقف کیں۔
ایل جی نے اہلیہ بائی ہولکر کا ذکر کرتے ہوئے کہا کہ ان کے وژن اور خدمات نے ملک کی روحانی روایات کو نئی زندگی دی۔
لیفٹیننٹ گورنر نے کہا کہ وزیر اعظم نریندر مودی کی قیادت میں بھارت میں خود اعتمادی، وقار اور ترقی کا نیا جذبہ پیدا ہوا ہے۔ گزشتہ۱۲برسوں میں ان کی رہنمائی نے عوام کو عزم کو عمل میں بدلنے کی ترغیب دی اور ملک کی ترقی کو نئی سمت دی۔
سنہا نے کہا کہ آج دنیا بھر میں بھارتی تارکین وطن فخر محسوس کر رہے ہیں کیونکہ وزیر اعظم نے ملک کے وقار کو بحال کیا ہے اور۲۰۴۷تک ترقی یافتہ بھارت کے خواب کو حقیقت بنانے کے لیے قوم کو متحد کیا ہے۔
ایل جی نے مزید کہا کہ۵؍ اگست۲۰۱۹کو آرٹیکل۳۷۰کی منسوخی کے ذریعے سردار پٹیل کے نامکمل خواب کو بھی پورا کیا گیا، جس سے قومی اتحاد کی بنیاد مزید مضبوط ہوئی۔
