’کوئی لاک ڈاؤن نہیں ہو رہا ہے ‘ یہ محض افواہیں ہیں ‘

ضروری اشیاء وافر مقدار میں موجود ‘تقسیم کو یقینی بنایا جارہا ہے :گرگ

ندائے مشرق خبر

سرینگر؍۲۵مارچ

ڈویژنل کمشنر کشمیر انشول گرگ نے بدھ کے روز ممکنہ لاک ڈاؤن سے متعلق پھیلائی جانے والی افواہوں کو مسترد کرتے ہوئے عوام سے اپیل کی ہے کہ وہ گھبراہٹ کا شکار نہ ہوں اور صرف سرکاری ذرائع پر ہی بھروسہ کریں۔

صحافیوں سے گفتگو کرتے ہوئے انہوں نے کہا’’لاک ڈاؤن کے حوالے سے کئی افواہیں گردش کر رہی ہیں، مگر حکومت کی جانب سے ایسی کوئی اطلاع نہیں ہے۔ اگر کوئی فیصلہ لیا گیا تو اسے باضابطہ طور پر عوام تک پہنچایا جائے گا۔ میں سب سے گزارش کرتا ہوں کہ گھبرائیں نہیں۔ ضروری اشیاء کے ذخائر کی مسلسل نگرانی کی جا رہی ہے اور ان کی دستیابی و تقسیم کو یقینی بنایا جا رہا ہے‘‘۔

گرگ نے افواہیں پھیلانے والوں کو خبردار کرتے ہوئے کہا کہ اس سلسلے میں سخت ہدایات جاری کی گئی ہیں اور غلط معلومات پھیلانے والوں کے خلاف کارروائی عمل میں لائی جائے گی۔ ان کا کہنا تھا کہ عوام مستند معلومات کے لیے صرف سرکاری پلیٹ فارمز پر انحصار کریں۔

سکیورٹی صورتحال کے حوالے سے ڈویژنل کمشنر نے کہا کہ حالات مستحکم ہیں اور مسلسل جائزہ لیا جا رہا ہے۔

ان کاکہنا تھا’’سکیورٹی صورتحال میں کوئی تبدیلی نہیں آئی۔ ضلعی انتظامیہ اور پولیس کی جانب سے باقاعدہ مشترکہ جائزے کیے جا رہے ہیں۔ سیاحتی مقامات کھولے جا رہے ہیں اور ہمیں سیاحوں کی بڑی آمد دیکھنے کو مل رہی ہے،” انہوں نے بتایا‘‘۔

سیاحتی سیزن کا ذکر کرتے ہوئے صوبائی کمشنر نے کہا کہ ٹیولپ گارڈن کے کھلنے کے بعد سیاحوں کی آمد میں نمایاں اضافہ ہوا ہے اور اس کی دن بھر نگرانی کی جا رہی ہے۔ انہوں نے سیاحوں سے اپیل کی کہ وہ آئندہ بہار اور گرمیوں کے موسم میں بڑی تعداد میں کشمیر کا رخ کریں۔