امریکی رپورٹ پر بی جے پی کا راہل گاندھی پر حملہ، اسے ملک کی خود مختاری سے جڑا معاملہ قرار دے دیا

نئی دہلی، 18 مارچ (یواین آئی) بھارتیہ جنتا پارٹی (بی جے پی) نے امریکی ادارے ‘یونائیٹڈ اسٹیٹس کمیشن آن انٹرنیشنل ریلیجیس فریڈم’ (یوایس سی آئی آرایف) کی رپورٹ کے حوالے سے کانگریس پارٹی اور سینئر لیڈر راہل گاندھی کو نشانے پر لیتے ہوئے اسے ہندوستان کی خود مختاری اور ہر شہری کی عزتِ نفس سے جڑا مسئلہ قرار دیا ہے۔
پارٹی ترجمان گورو بھاٹیہ نے بدھ کو یہاں منعقدہ ایک پریس کانفرنس میں کہا کہ یو ایس سی آئی آر ایف کی رپورٹ پر راہل گاندھی کا ردعمل افسوسناک ہے۔ انہوں نے الزام لگایا کہ مسٹر گاندھی رپورٹ کو مکمل پڑھے بغیر ہی ہندوستان مخالف قوتوں کا ساتھ دے رہے ہیں۔ بھاٹیہ نے کہا کہ کانگریس نے سوشل میڈیا پر اس رپورٹ کا حوالہ دیتے ہوئے مرکزی حکومت پر سوالات اٹھائے ہیں، لیکن یہ واضح نہیں ہے کہ مسٹر گاندھی کس بنیاد پر اس رپورٹ کی حمایت کر رہے ہیں۔ انہوں نے سوال اٹھایا کہ کیا انہوں نے اس رپورٹ کو غور سے پڑھا بھی ہے؟
مسٹر بھاٹیہ نے کہا کہ اس امریکی رپورٹ میں بھارت کی انٹیلی جنس ایجنسی ‘ریسرچ اینڈ اینالیسس ونگ’ (را) پر پابندی لگانے کی سفارش کی گئی ہے، جو کہ مکمل طور پر ناقابلِ قبول ہے۔ انہوں نے کہا کہ ‘رآ’ نے ملک کی سلامتی کے لیے اہم کردار ادا کیا ہے اور اس کے کئی افسران نے ملک کی خاطر اپنی جانیں قربان کی ہیں۔
بھاٹیہ نے الزام لگایا کہ پاکستان ہمیشہ ہندوستان اور ‘رآ’ کی مخالفت کرتا ہے، لیکن اب راہل گاندھی بھی اسی طرح کے بیانات دے رہے ہیں جو کہ تشویشناک ہے۔ انہوں نے کہا کہ ہندوستان کے اپوزیشن لیڈر کا اس طرح غیر ملکی رپورٹ کی حمایت کرنا ملک کے مفاد کے خلاف ہے۔
مسٹر بھاٹیہ نے مزید کہا کہ اس امریکی ادارے کا وائس چیئرمین (نائب صدر) پاکستانی نژاد آصف محمود ہے، جس کی وجہ سے اس ادارے اور اس کی رپورٹ کی صداقت پر سوال اٹھنا فطری ہے۔ انہوں نے واضح کیا کہ ہندوستان کو کسی بھی غیر ملکی ادارے سے سرٹیفکیٹ لینے کی ضرورت نہیں ہے اور ملک کا جمہوری نظام مضبوط ہے۔