مشرق وسطیٰ میں کشیدگی کے باوجود ایندھن کی سپلائی مستحکم، ایل پی جی کی پیداوار میں 40 فیصد اضافہ

نئی دہلی، 18 مارچ (یو این آئی) حکومت نے بدھ کو واضح کیا ہے کہ ملک میں ایل پی جی کی مقامی پیداوار میں 40 فیصد اضافہ ہوا ہے اور ایندھن کی کوئی کمی نہیں ہے۔ اس کے ساتھ ہی ریاستوں پر زور دیا گیا ہے کہ وہ اصلاحات کے عمل کو تیز کریں اور ذخیرہ اندوزی و بلیک مارکیٹنگ کے خلاف سخت کارروائی کریں۔
پٹرولیم اور قدرتی گیس کی وزارت کی جوائنٹ سکریٹری سجاتا شرما نے میڈیا بریفنگ میں بتایا: "ایل پی جی کی گھریلو پیداوار میں 40 فیصد اضافہ ہوا ہے۔ ریٹیل آؤٹ لیٹس اور پٹرول پمپوں پر وافر اسٹاک موجود ہے، اور ملک بھر میں ایل پی جی، پٹرول اور ڈیزل دستیاب ہے۔” انہوں نے مزید کہا کہ پائپڈ نیچرل گیس (پی این جی ) اور ٹرانسپورٹ کے لیے کمپریسڈ نیچرل گیس (سی این جی ) کی سپلائی بھی مکمل طور پر مستحکم ہے۔
صارفین کو یقین دہانی کراتے ہوئے محترمہ شرما نے کہا کہ کسی بھی زمرے میں سپلائی متاثر نہیں ہوئی ہے۔ انہوں نے سٹی گیس ڈسٹری بیوشن (سی جی ڈی ) نیٹ ورک کی توسیع کے لیے ریاستوں کے تعاون کی ضرورت پر بھی زور دیا۔ انہوں نے بتایا کہ سی جی ڈی درخواستوں کی منظوری کے لیے ریاستی اور ضلعی سطح پر کمیٹیاں بنائی جا رہی ہیں اور کرایوں میں کمی کے لیے 4 فیصد اضافی الاؤنس بھی فراہم کیا گیا ہے۔
وزارتِ بندرگاہ، جہاز رانی اور آبی گزرگاہوں کے اسپیشل سکریٹری راجیش کمار سنہا نے بتایا کہ مشرق وسطیٰ میں کشیدگی کے باوجود بحری آپریشنز متاثر نہیں ہوئے ہیں۔ انہوں نے کہا: "آبنائے ہرمز کے علاقے میں تمام ہندوستانی جہاز اور جہاز راں محفوظ ہیں اور کسی ناخوشگوار واقعے کی اطلاع نہیں ملی۔” گزشتہ 24 گھنٹوں میں 25 ہندوستانی جہاز خطے کی بندرگاہوں سے واپس آئے ہیں، اور ایل پی جی بردار جہازوں ‘شوالک’ اور ‘نندا دیوی’ سے سامان اتارنے کا کام شیڈول کے مطابق جاری ہے۔
سفارتی کوششوں کے حوالے سے وزارت خارجہ کے ترجمان رندھیر جیسوال نے بتایا کہ وزیراعظم نریندر مودی نے متحدہ عرب امارات (یواے ای ) کے صدر شیخ محمد بن زاید آل نہیان سے بات چیت کی ہے۔ دونوں رہنماؤں نے مشرق وسطیٰ کی صورتحال پر تبادلہ خیال کیا اور آبنائے ہرمز کے ذریعے محفوظ اور آزاد جہاز رانی کو یقینی بنانے کی اہمیت پر اتفاق کیا۔
وزارت خارجہ کے ایڈیشنل سکریٹری (خلیج) اسیم آر مہاجن نے بتایا کہ 28 فروری سے اب تک تقریباً 2.6 لاکھ مسافر ہندوستان واپس آچکے ہیں۔ یو اے ای سے پروازوں کا سلسلہ جاری ہے، جہاں 17 مارچ کو 70 اور بدھ کو تقریباً 75 پروازیں متوقع ہیں۔ عمان اور سعودی عرب سے بھی فضائی خدمات جاری ہیں، جبکہ قطر کی فضائی حدود جزوی طور پر کھلی ہوئی ہیں۔