حکومت نے افواج کو جدید اور عالمی معیار کا بنانے کے لیے ’ڈیفنس فورسز وژن 2047‘ جاری کیا

نئی دہلی، 10 مارچ (یو این آئی) حکومت نے مسلح افواج کو جدید، یکجا اور جدید ٹیکنالوجی سے لیس کرکے دنیا کی اعلیٰ ترین افواج کی صف میں شامل کرنے کی طویل مدتی منصوبہ بندی کو عملی جامہ پہنانے کے لیے منگل کے روز ’ڈیفنس فورسز وژن 2047: مستقبل کے لیے تیار ہندوستانی فوجی قوت کا خاکہ‘ سے متعلق ایک جامع دستاویز جاری کی۔
ہیڈکوارٹرز انٹیگریٹڈ ڈیفنس اسٹاف کی جانب سے تیار کیے گئے اس دستاویز میں افواج کے درمیان ہم آہنگی (انضمام) بڑھانے، خود انحصاری کو تیز کرنے اور آنے والی دہائیوں میں ابھرنے والے سیکورٹی چیلنجز سے نمٹنے کے لیے آپریشنل صلاحیتوں کو مضبوط بنانے کا اسٹریٹجک خاکہ پیش کیا گیا ہے۔ وزیر دفاع راج ناتھ سنگھ نے ساؤتھ بلاک میں یہ دستاویز جاری کیں۔
وزارتِ دفاع نے ایک بیان میں کہا کہ یہ وژن دستاویز بدلتے ہوئے جغرافیائی سیاسی، تکنیکی اور سیکورٹی ماحول کا مؤثر طور پر مقابلہ کرنے کے لیے مسلح افواج میں ضروری اسٹریٹجک اصلاحات، صلاحیت میں توسیع اور تنظیمی تبدیلیوں کا خاکہ پیش کرتی ہے۔
اس میں فوج کو ایک متحد، کثیر شعبہ جاتی (ملٹی ڈومین) اور چست فوجی قوت میں تبدیل کرنے کا تصور پیش کیا گیا ہے، جو بدلتے عالمی اور علاقائی منظرنامے کے درمیان دشمنوں سے نمٹنے، تنازع کے پورے دائرے میں جوابی کارروائی کرنے اور ہندوستان کے بڑھتے ہوئے اسٹریٹجک مفادات کے تحفظ کے قابل ہو۔اس وژن کا ایک اہم ستون تینوں افواج کے درمیان انضمام اور ہم آہنگی کو فروغ دینا ہے تاکہ منصوبہ بندی، آپریشن اور صلاحیت کی ترقی میں بہتر تال میل قائم ہو سکے۔
دستاویز میں مستقبل کی جنگوں کے چیلنجوں سے نمٹنے کے لیے جدت، جدید ٹیکنالوجی اور جدید تربیتی ڈھانچے کی اہمیت پر بھی زور دیا گیا ہے، تاکہ ایسی فوج تیار کی جا سکے جو بدلتے حالات کے مطابق خود کو ڈھال سکے۔
ایک اور اہم شعبہ ’آتم نربھرتا‘ یعنی خود انحصاری ہے، جس کے تحت ملک کی مخصوص سیکورٹی ضروریات کے مطابق مقامی ٹیکنالوجی اور حل کے فروغ اور استعمال کی حوصلہ افزائی کی جائے گی۔ مقامی دفاعی صنعت اور تکنیکی صلاحیتوں کو مضبوط بنانے سے آپریشنل تیاری میں اضافہ ہونے کے ساتھ ساتھ قومی ترقی میں بھی تعاون ملنے کی امید ہے۔