کچھوؤں اور مگرمچھوں کی اسمگلنگ کرنے والے بین الاقوامی گروہ کا سرغنہ کانپور میں گرفتار

نئی دہلی، 9 مارچ (یو این آئی) حکومت نے پیر کے روز بتایا کہ مدھیہ پردیش اسٹیٹ ٹائیگر اسٹرائیک فورس (ایم پی ایس ٹی ایس ایف) نے مرکزی وائلڈ لائف کرائم کنٹرول بیورو (ڈبلیو سی سی بی) کے تعاون سے ایک مہم چلا کر رینگنے والے جانوروں کی اسمگلنگ کرنے والے گروہ کے مرکزی سرغنہ کو کانپور ضلع میں گرفتار کیا ہے۔
مدھیہ پردیش میں کچھوؤں اور مگرمچھوں کی بین الاقوامی غیر قانونی تجارت سے وابستہ تین مقدمات میں مطلوب ملزم تارک ناتھ گھوش گزشتہ آٹھ برس سے مفرور تھا۔ اس کے خلاف تین مختلف عدالتوں نے گرفتاری کے وارنٹ جاری کیے تھے۔ وزارتِ ماحولیات، جنگلات اور موسمیاتی تبدیلی نے پیر کے روز ایک بیان میں بتایا کہ تارک ناتھ گھوش کا گروہ اتر پردیش، مدھیہ پردیش، آندھرا پردیش، بہار، اڈیشہ، تمل ناڈو، کرناٹک اور مغربی بنگال سمیت کئی ریاستوں میں پھیلا ہوا ہے۔ شبہ ہے کہ اس کا نیٹ ورک ہندوستان کے علاوہ بنگلہ دیش، تھائی لینڈ، مینمار اور سنگاپور تک پھیلا ہوا ہے۔ گھوش کی گرفتاری جنگلی حیات کی غیر قانونی اسمگلنگ کے منظم نیٹ ورک کے لیے ایک بڑا دھچکا ہے۔ اسے 9 مارچ بروز پیر شیَوپوری (مدھیہ پردیش) کے چیف جوڈیشل مجسٹریٹ کے سامنے پیش کیا جانا ہے۔ بیان میں کہا گیا ہے کہ گروہ کے نیٹ ورک کے بارے میں مزید معلومات اور خفیہ معلومات حاصل کرنے کے لیے پولیس اور محکمۂ جنگلات کے افسران عدالت سے درخواست کریں گے کہ تارک ناتھ کو پوچھ گچھ کے لیے حراست میں دیا جائے۔