آج میں قوم کو یقین دلانا چاہتا ہوں کہ۳۱مارچ تک ملک ماؤ نوازوں سے پاک ہو جائے گا:وفاقی وزیر داخلہ
’ ہماری فورسز ان لوگوں کو شکست دیں گی جو تروپتی سے پشوپتی تک سرخ راہداری بنانے کا خواب دیکھتے ہیں‘
ایجنسیز
منڈالی؍ ۶مارچ
رکزی وزیر داخلہ امیت شاہ نے جمعہ کے روز کہا کہ ملک اس ماہ کے اختتام تک ماؤ نوازوں کے خاتمے کے قریب پہنچ چکا ہے اور سکیورٹی فورسز ان عناصر کو شکست دیں گی جو آندھرا پردیش کے تروپتی سے نیپال کے پشوپتی تک ’ریڈ کوریڈور‘ قائم کرنے کا خواب دیکھتے ہیں۔
اڈیشہ کے ضلع کٹک کے منڈالی میں سینٹرل انڈسٹریل سکیورٹی فورس(سی آئی ایس ایف) کے۵۷ویں یومِ تاسیس کے موقع پر منعقدہ تقریب سے خطاب کرتے ہوئے انہوں نے کہا کہ یہ فورس اہم تنصیبات کو تحفظ فراہم کر کے ملک کی معاشی ترقی میں محرک کا کردار ادا کرتی ہے۔
شاہ نے کہا’’آج میں قوم کو یقین دلانا چاہتا ہوں کہ۳۱مارچ تک ملک ماؤ نوازوں سے پاک ہو جائے گا۔ ہماری فورسز ان لوگوں کو شکست دیں گی جو تروپتی سے پشوپتی تک سرخ راہداری بنانے کا خواب دیکھتے ہیں‘‘۔
وزیر داخلہ نے کہا کہ وزیر اعظم نریندر مودی کی بصیرت افروز قیادت میں ملک کی سکیورٹی فورسز کے لیے ماؤ نوازوں کو جڑ سے اکھاڑ پھینکنا ایک بڑی کامیابی ہوگی۔
شاہ نے کہا’’ہماری سکیورٹی فورسز قوم کی توقعات پر پوری اتری ہیں اور ملک اب سرخ باغیوں کے خاتمے کے دہانے پر کھڑا ہے‘‘۔
وزیر داخلہ نے کہا کہ وزیر اعظم کے۲۰۴۷تک ’وکست بھارت‘ کے ہدف کو حاصل کرنے کے لیے فورسز نے اندرونی سلامتی کو یقینی بنایا ہے جو کسی بھی قوم کی ترقی کے لیے سب سے اہم عنصر ہے۔
شاہ نے کہا کہ سی آئی ایس ایف ڈیموں، صنعتی اداروں اور پارلیمنٹ سمیت اہم تنصیبات کو تحفظ فراہم کر رہی ہے اور اس نے ’’ملک کی معاشی ترقی میں ایک محرک کا کردار ادا کیا ہے‘‘۔انہوں نے زور دیتے ہوئے کہا کہ بلند معاشی ترقی اسی وقت ممکن ہے جب امن قائم ہو، اور کہا،
’’ہمارے سکیورٹی اہلکاروں نے صنعتی امن کو برقرار رکھنے کے اپنے عزم کو مؤثر انداز میں نافذ کیا ہے‘‘۔
وفاقی وزیر داخلہ نے کہا کہ مضبوط قومی معیشت کی تعمیر اور بھارت کو دنیا کی سب سے بڑی معیشت بنانے کا خواب صنعتی ترقی کے بغیر ممکن نہیں، اور صنعتی ترقی کے لیے محفوظ ماحول فراہم کرنے کے لیے قومی سطح کی صنعتی سکیورٹی فورس کی ضرورت ہوتی ہے۔
اپنے خطاب میں شاہ نے کہا کہ۵۶سال مکمل کرنے کے بعد سی آئی ایس ایف نے صنعتی سلامتی کے میدان میں صفر سے بلندیوں تک کا سفر طے کیا ہے جو فورس کی لگن اور بہادری کی داستان ہے۔
انہوں نے کہا کہ جرات، قربانی اور عزم کو بھارت کی تاریخ کی شاندار روایات کے ساتھ جوڑتے ہوئے اور خود کو جدید ہتھیاروں سے لیس کر کے سی آئی ایس ایف نے ہر قسم کے چیلنج کا مقابلہ کرنے کے عزم کا مظاہرہ کیا ہے۔
شاہ نے کہا کہ سی آئی ایس ایف کے بغیر بھارت کی صنعتی ترقی کا تصور ممکن نہیں۔ انہوں نے مزید بتایا کہ حال ہی میں وزارت داخلہ نے فیصلہ کیا ہے کہ ملک کی تمام بندرگاہوں کی سکیورٹی سی آئی ایس ایف کے سپرد کی جائے گی۔
وزیر داخلہ نے کہا کہ آنے والے دنوں میں یہ فورس ہائبرڈ موڈ کے تحت نجی صنعتی گروپوں کو بھی سکیورٹی فراہم کرے گی۔
شاہ نے کہا کہ وزیر اعظم نے عوام کے سامنے کئی اہداف رکھے ہیں، جن میں۲۰۴۷تک بھارت کو مکمل طور پر ترقی یافتہ ملک بنانا، ہر شعبے میں عالمی سطح پر سرفہرست مقام حاصل کرنا اور۲۰۲۷تک ملک کو دنیا کی تیسری بڑی معیشت بنانا شامل ہے۔انہوں نے کہا کہ ان اہداف کے حصول میں سی آئی ایس ایف ایک محرک کا کردار ادا کر رہی ہے۔
وزیر داخلہ نے تقریب کے دوران ورچوئل انداز میں دو رہائشی منصوبوں کا افتتاح کیا اور۸۹۰کروڑ روپے کی لاگت سے تین ریزرو بٹالینوں کی بنیاد بھی رکھی۔
