سنہا کی حکام کو ہائی الرٹ رہنے کی ہدایت 

لیفٹیننٹ گورنر نے جموں و کشمیر میں امن برقرار رکھنے کے لیے تمام ضروری اقدامات کرنے کی ہدایت بھی دی
عوام اور کمیونٹی رہنماؤں سےہم آہنگی کو برقرار رکھنے اور پُرسکون ماحول کو یقینی بنانے کی اپیل
(ویب ڈیسک )
سری نگر؍۳مارچ
لیفٹیننٹ گورنر منوج سنہا نے منگل کو پولیس اور سول انتظامیہ کے حکام کو ہدایت دی کہ وہ ہائی الرٹ رہیں اور جموں و کشمیر میں امن اور سکون برقرار رکھنے کے لیے تمام ضروری اقدامات کریں۔
سنہا نے ایکس پر ایک پوسٹ میں کہا’’پولیس کنٹرول روم، کشمیر میں سینئر پولیس اور سول انتظامیہ کے حکام کی میٹنگ کی صدارت کی، تاکہ امن و امان کی صورتحال کا جائزہ لیا جا سکے۔ افسران کو ہدایت دی کہ وہ ہائی الرٹ رہیں اور عوامی امن اور سکون کو یقینی بنانے کے لیے تمام ضروری اقدامات کریں‘‘۔
ایل جی نے عوام اور کمیونٹی رہنماؤں سے اپیل کی کہ وہ ہم آہنگی کو برقرار رکھیں اور ایک پُرسکون ماحول کو یقینی بنائیں۔
سنہا نے کہا’’میں شہریوں اور کمیونٹی لیڈروں سے بھی اپیل کرتا ہوں کہ وہ ہم آہنگی کو برقرار رکھیں اور معاشرے میں سکون اور خیرسگالی کے ماحول میں اپنا کردار ادا کریں۔ امن کو محفوظ رکھنا اور معاشرے کی پیش رفت کو برقرار رکھنا ایک مشترکہ ذمہ داری ہے جو ہم میں سے ہر ایک پر یکساں طور پر عائد ہوتی ہے‘‘۔
ایل جی نے دن کے اوائل میں یہاں اعلیٰ سیکورٹی حکام کے ساتھ ایک میٹنگ میں جموں و کشمیر کی سیکورٹی صورتحال کا جائزہ لیا۔ ایک سرکاری ترجمان نے کہا’’لیفٹیننٹ گورنر نے مرکز کے زیر انتظام علاقہ جموں و کشمیر میں موجودہ سیکورٹی منظرنامے پر تفصیلی غور و خوض کیا‘‘۔
یہ میٹنگ کشمیر اور جموں خطے کے بعض حصوں میں ایران کے سپریم لیڈر آیت اللہ علی خامنہ ای کی امریکا اور اسرائیل کے مشترکہ حملے میں ہلاکت کے خلاف وسیع پیمانے پر احتجاج کے تناظر میں منعقد ہوئی۔
میٹنگ میں نالن پربھات، ڈی جی پی جموں و کشمیر؛ ایس جے ایم گیلانی، اسپیشل ڈی جی (کوآرڈینیشن)؛ آنند جین، اے ڈی جی پی آرمڈ؛ نتیش کمار، اے ڈی جی پی سی آئی ڈی؛ وی کے بردی، آئی جی پی کشمیر؛ انشُل گرگ، ڈویژنل کمشنر کشمیر؛ راجیو پانڈے، ڈی آئی جی، سی کے آر؛ اکشے لابرو، ڈپٹی کمشنر سری نگر اور دیگر سینئر حکام نے شرکت کی۔
اس سے قبل لیفٹیننٹ گورنر شری منوج سنہا نے منگل کو مرکز کے زیر انتظام علاقہ جموں و کشمیر میں موجودہ سیکورٹی منظرنامے پر تفصیلی غور و خوض کیا۔
لوک بھون، سری نگر میں منعقدہ میٹنگ میں لیفٹیننٹ جنرل پرتیک شرما، جنرل آفیسر کمانڈنگ اِن چیف (جی او سی اِن سی)، ناردرن کمانڈ؛ شری نالن پربھات، ڈی جی پی، جموں و کشمیر؛ لیفٹیننٹ جنرل پرشانت سریواستو، جی او سی۱۵ویںکور اور میجر جنرل بلبیر سنگھ، ایم جی جی ایس، ناردرن کمانڈ نے شرکت کی۔
اس دوران منگل کو مسلسل دوسرے روز بھی کشمیر میں سخت پابندیاں برقرار رہیں۔
احتیاطی اقدام کے طور پر جہاں تعلیمی ادارے دو روز کے لیے بند رکھے گئے اور پیر کو موبائل انٹرنیٹ کی رفتار کم کر دی گئی، وہیں منگل کو بعض مقامات پر احتجاج کے پُرتشدد رخ اختیار کرنے کے بعد حکام نے کشمیر میں سکیورٹی فورسز کے قافلوں کی نقل و حرکت بھی منسوخ کر دی۔
کشیدگی سے بچنے کے لیے منگل کے روز تعینات سکیورٹی فورسز کے لیے کسی بھی قسم کی روڈ اوپننگ پارٹی تعینات نہ کرنے کا بھی فیصلہ کیا گیا ہے۔
کشمیر ڈویژن کی انتظامیہ نے عوام سے ضبط و تحمل کا مظاہرہ کرنے اور حکام کی جانب سے جاری کردہ ہدایات پر عمل کرنے کی اپیل کی ہے۔ایک ترجمان نے کہا’’ڈویژنل انتظامیہ کشمیر، وادی میں امن و امان برقرار رکھنے میں تمام برادریوں کے کردار کو سراہتی ہے۔ شہریوں کو مشورہ دیا جاتا ہے کہ وہ ضبط و تحمل کا مظاہرہ کریں، مقامی انتظامیہ کی جانب سے جاری کردہ ہدایات پر عمل کریں اور ڈیجیٹل پلیٹ فارمز پر صرف مصدقہ معلومات ہی شیئر کریں۔‘‘