کہاسرمائی کھیل کھیلوں کے جذبے کے امن، مساوات اور رفاقت کے نظریات کو زندہ کرتے ہیں
گلمرگ: لیفٹیننٹ گورنر منوج سنہا نے پیر کے روز گلمرگ میں کھیلو انڈیا سرمائی کھیلوں کے چھٹے ایڈیشن کا افتتاح کیا۔
لیفٹیننٹ گورنر نے تمام شریک کھلاڑیوں اور ٹیم عہدیداروں کا خیرمقدم کرتے ہوئے انہیں نیک تمناؤں کا اظہار کیا۔
سنہا نے کہا کہ گلمرگ میں کھیلو انڈیا سرمائی کھیل ایک سادہ کھیلوں کی تقریب سے ترقی کرتے ہوئے ایک حقیقی قومی تہوار کی صورت اختیار کر چکے ہیں۔
ان کاکہنا تھا’’کھیلو انڈیا سرمائی کھیل کھیلوں کے جذبے کے امن، مساوات اور رفاقت کے نظریات کو زندہ کرتے ہیں۔ ہماری متنوع اور رنگارنگ قوم، جو بے شمار زبانوں، ثقافتوں اور روایات پر مشتمل ہے، اس میں گلمرگ کے سرمائی کھیل ایک عالمگیر زبان اور مشترکہ ورثے کے طور پر کام کر رہے ہیں۔گلمرگ کے سرمائی کھیل زندگی کے سخت چیلنجوں کی عکاسی کرتے ہیں، جو مستقبل کی کامیابیوں کے لیے لچک پیدا کرتے ہیں۔ گرنا، غلطیوں کا جائزہ لینا اور بہتر ہو کر دوبارہ اٹھ کھڑا ہونا‘ یہی کھیلوں کے حقیقی اسباق ہیں، جنہیں اسکیئر یہاں عملی طور پر جئیں گے‘‘۔
لیفٹیننٹ گورنر نے زور دے کر کہا کہ کھیلو انڈیا سرمائی کھیلوں کا وسیع تر مقصد قومی یکجہتی کو مضبوط بنانا ہے۔انہوں نے کہا کہ یہ عظیم سرمائی کھیلوں کی تقریب ہماری قومی کھیل وراثت، اس کی یکجہتی اور کھیلوں کی اس تبدیلی آفرین قوت کا جشن ہے جو ہر شہری اور کھلاڑی کو جوڑتی ہے، ان کے جذبے کو مہمیز دیتی ہے اور مضبوط کردار تشکیل دیتی ہے۔
ایل جی نے کہا’’شدید مسابقت مشترکہ گفتگو اور دیرپا دوستیوں کو جنم دیتی ہے، جو اس بات کا ثبوت ہے کہ صحت مند مقابلہ اور باہمی احترام ساتھ ساتھ چل سکتے ہیں۔ ہمارے لوگوں کو اس جذبے کی پہلے سے زیادہ ضرورت ہے۔ جب آپ ان اسکی ڈھلوانوں پر دوڑ لگائیں تو یاد رکھیں:تنوع ہماری طاقت ہے، تقسیم نہیں۔ کھیلو انڈیا ہمیں یاد دلاتا ہے کہ ہماری زبانیں مختلف ہو سکتی ہیں مگر ہمارے مقاصد اور اقدار ہمیں متحد رکھتے ہیں‘‘۔
لیفٹیننٹ گورنر نے کہا ’’جب مختلف ریاستوں کے کھلاڑی ایک ساتھ تربیت حاصل کرتے ہیں، بھرپور مقابلہ کرتے ہیں اور ایک دوسرے کی حوصلہ افزائی کرتے ہیں تو زبان، ثقافت اور خطے کی رکاوٹیں کھیلوں کے جذبے کے سامنے ختم ہو جاتی ہیں‘‘۔
سنہا نے کہا کہ سرمائی کھیل کھلاڑیوں کو فطرت کے مقابل لا کھڑا کرتے ہیں جہاں کامیابی کے لیے غیر معمولی مہارت درکار ہوتی ہے، اور آنے والے دنوں میں ہم تکنیکی مہارت، برسوں کی مشق سے پیدا ہونے والے اعتماد، غیر متزلزل عزم اور غیر معمولی برداشت کا مظاہرہ دیکھیں گے۔انہوں نے کھلاڑیوں پر زور دیا کہ وہ کھیلوں کی اعلیٰ اقدار کو برقرار رکھتے ہوئے پورے ٹورنامنٹ میں اپنی بہترین کارکردگی پیش کریں۔
لیفٹیننٹ گورنر نے مزید کہا’’گلمرگ کی ان اسکی ڈھلوانوں پر کھلاڑی کی شناخت صرف اس کی کارکردگی سے وابستہ ہے؛ ہر نتیجہ آپ کی مہارت، نظم و ضبط اور حوصلے کی عکاسی کرتا ہے، جو نئے چیمپئن پیدا کرتا ہے۔الپائن اسکیئنگ، نارڈک اسکیئنگ، اسنوبورڈنگ اور اسکی ماؤنٹینئرنگ جیسے مقابلوں میں کھلاڑیوں کی سخت تربیت اور غیر متزلزل لگن نمایاں ہوگی‘‘۔
ایل جی نے وزیر اعظم نریندر مودی کی قیادت میں گزشتہ چند برسوں کے دوران جموں و کشمیر میں کھیلوں کے شعبے میں آنے والی تبدیلی کا ذکر کرتے ہوئے کہا کہ وزیر اعظم کے ترقیاتی پیکیج کے تحت جدید کھیل بنیادی ڈھانچے کا قیام اور۱۰۰کھیلو انڈیا مراکز کے قیام نے کھیلوں کے منظرنامے کو نئی شکل دی ہے۔
ایل جی نے کہا کہ جدید سہولیات، جموں و کشمیر کے نوجوانوں کی صلاحیت اور لگن اور سرشار عہدیداروں کی فعال حمایت نے اس شعبے کو زبردست فروغ دیا ہے۔لیفٹیننٹ گورنر نے کہا کہ حقیقی کردار صرف فتح میں نہیں بلکہ آزمائش میں ظاہر ہوتا ہے اور ایک حقیقی کھلاڑی کامیابی میں متواضع اور شکست میں باوقار رہتا ہے۔
سنہا نے کہا’’۲۶فروری کو کھیلو انڈیا سرمائی کھیلوں کے چھٹے ایڈیشن کی اختتامی تقریب میں کامیابی کا معیار صرف تمغے نہیں ہوں گے بلکہ اتحاد، باہمی احترام اور اعلیٰ کارکردگی کے مسلسل حصول کا جذبہ ہوگا‘‘۔
چار روزہ کھیلو انڈیا سرمائی کھیلوں میں مختلف ریاستوں اور مرکز کے زیر انتظام علاقوں سے تقریباً ایک ہزار کھلاڑی اور عہدیدار مختلف مقابلوں میں حصہ لے رہے ہیں۔
افتتاحی تقریب میں وزیر اعلیٰ عمر عبداللہ نے بھی شرکت کی ۔
