گلمرگ: جموں و کشمیر کے وزیر اعلیٰ عمر عبداللہ نے پیر کے روز گلمرگ میں مصنوعی برف کے انتظام کی وکالت کرتے ہوئے کہا کہ موسمیاتی تبدیلی کے پیشِ نظر سیاحت کو فروغ دینے اور اس مقام کو سرمائی کھیلوں کے مرکز کے طور پر مستحکم کرنے کے لیے یہ اقدام ناگزیر ہو چکا ہے۔
شمالی کشمیر کے ضلع بارہمولہ میں کھیلو انڈیا سرمائی کھیلوں کے چھٹے ایڈیشن کی افتتاحی تقریب کے موقع پر صحافیوں سے بات کرتے ہوئے وزیر اعلیٰ نے کہا کہ گلمرگ ملک میں سرمائی کھیلوں کے لیے سب سے نمایاں مقام ہے، تاہم بدلتے موسمی رجحانات کے باعث بنیادی ڈھانچے میں تبدیلی لانا وقت کی ضرورت ہے۔
عمرعبداللہ نے کہا ’’یہ ایک بہت بڑی بات ہے کہ گلمرگ چھٹی بار سرمائی کھیلوں کی میزبانی کر رہا ہے۔ اس سے ظاہر ہوتا ہے کہ ملک میں ان کھیلوں کے لیے اس سے بہتر جگہ کوئی نہیں۔ تاہم حقیقت یہ ہے کہ موسمی پیٹرن بدل رہے ہیں۔ ہم نے کبھی سوچا بھی نہیں تھا کہ فروری میں گلمرگ میں اتنی گرمی ہوگی۔ یہ ایک حقیقت ہے اور ہمیں اسے قبول کرنا ہوگا۔ ہم اس کے مطابق جو بھی اقدامات ضروری ہوں گے، وہ کریں گے۔‘‘
وزیر اعلیٰ نے کہا کہ موسم کے انداز غیر متوقع ہو چکے ہیں اور حکومت کو سرمائی کھیلوں کے بنیادی ڈھانچے کی طویل مدتی منصوبہ بندی پر از سرِ نو غور کرنا ہوگا۔
عمر عبداللہ نے کہا ’’دنیا بھر میں جہاں بھی سرمائی کھیل منعقد ہوتے ہیں، وہاں مصنوعی برف کے بغیر یہ ممکن نہیں۔ اٹلی کے شہر کورٹینا میں منعقد ہونے والے سرمائی اولمپکس، جو کل اختتام پذیر ہوئے، مصنوعی برف کے بغیر ممکن نہ تھے۔۱۹۷۰کی دہائی سے یہ ثابت ہو چکا ہے کہ ہر سرمائی اولمپکس کے لیے مصنوعی برف ایک ضرورت ہے۔‘‘
وزیر اعلیٰ نے گلمرگ میں بھی اسی نوعیت کے انتظامات کرنے کا عزم ظاہر کرتے ہوئے کہا کہ اس سے کھلاڑیوں اور سیاحتی شعبے دونوں کو فائدہ پہنچے گا۔ انہوں نے کہا کہ سرمائی سیاحت خطے کے لیے بے حد اہم ہے اور حکومت اسے فروغ دینے کے لیے اقدامات کرے گی۔
کھیلو انڈیا سرمائی کھیلوں میں خواتین کی شرکت سے متعلق سوال کے جواب میں انہوں نے کہا کہ سرمائی کھیل صنفی تفریق کم کرنے کا مؤثر ذریعہ ہیں اور تقریباً ہر مقابلے میں مرد و خواتین تقریباً برابر سطح پر حصہ لیتے ہیں۔
انہوں نے کہا، ’’ان کھیلوں میں خواتین کی بڑھتی ہوئی شرکت دیکھ کر خوشی ہوتی ہے۔ تاہم ہمیں یہ یقینی بنانا ہوگا کہ مناسب سہولیات اور معیاری کوچنگ دستیاب ہوں تاکہ ہم مستقبل میں تمغوں کے حصول کی پوزیشن میں آ سکیں۔‘‘
عمر عبداللہ نے اس بات پر افسوس کا اظہار کیا کہ جموں و کشمیر کے کھلاڑی ابھی تک عالمی سطح پر تمغے جیتنے کے معیار تک نہیں پہنچ سکے ہیں۔
وزیر اعلیٰ نے کہا، ’’مجھے امید ہے کہ میری زندگی میں ہم اپنی کارکردگی کو اس سطح تک لے جائیں گے۔ ہم نے دیکھا ہے کہ بھارت نے گرمیوں کے اولمپکس میں ایتھلیٹکس اور نشانہ بازی میں انفرادی تمغے جیتے ہیں۔ امید ہے کہ ہم سرمائی کھیلوں میں بھی ایسا ہی دیکھیں گے۔‘‘
