سرینگر: وادی کشمیر میں موسم گرما سے قبل ہی ریکارڈ توڑ گرمی ریکارڈ ہونے کے بیچ محکمہ موسمیات نے وادی میں اگلے پانچ دنوں کے دوران درجہ حرارت میں مزید اضافہ درج ہونےکی پیش گوئی کی ہے۔
محکمے نے اپنی ایڈوائزری میں کہا کہ وادی کے بشیتر مقامات پر اگلے۵دنوں کے دوران دن اور رات کے درجہ حرارت میں ایک سےدوڈگری سینٹی گریڈ کا اضافہ ریکارڈ ہو سکتا ہے۔
محکمے کے ایک ترجمان نے وادی میں ماہ رواں کے اختتام تک بڑے پیمانے پر برف باراں کو خارج از امکان قرار دیا ہے۔انہوں نے کہا کہ وادی میں۲۳سے۲۶فروری تک موسم مجموعی طور پر خشک رہنے کا امکان ہے۔
ترجمان کا کہنا ہے کہ۲۷؍اور۲۸ فروری کو کہیں کہیں ہلکی برف باری یا بارشیں ہوسکتی ہیں۔
ترجمان نے کہا کہ بعد میں یکم مارچ سے۳ مارچ تک موسم عام طور پر ابر آلود رہ سکتا ہے اور اس دوران کہیں کہیں ہلکی برف باری یا بارشیں متوقع ہے۔انہوں نے کہا کہ۴سے۷مارچ تک موسم جزوی طور پر ابر آلود رہنے کا امکان ہے۔
محکمے نے کسانوں سے کہا ہے کہ وہ اس دوران اپنے کھیت کھلیانوں اور باغوں میں اپنے کام جاری رکھ سکتے ہیں۔
دریں اثنا وادی کے بیشتر علاقوں میں شبانہ درجہ حرارت۰سے۶ڈگری سینٹی گریڈ معمول سے زیادہ ریکارڈ ہوا ہے اور مشہور سیاحتی مقام پہلگام سرد ترین علاقہ رہا ہے جہاں کم سے کم درجہ حرارت منفی ۲ء۰ڈگری سینٹی گریڈ ریکارڈ ہوا ہے۔
وادی کے ایک اور سیاحتی مقام گلمرگ میں شبانہ درجہ حرارت منفی۰ء۴ڈگری سینٹی گریڈ جبکہ گرمائی دارلحکومت سری نگر میں کم سے کم درجہ حرارت۱ء۶ڈگری سینٹی گریڈ ریکارڈ ہوا ہے۔
شمالی ضلع کپوارہ میں کم سے کم درجہ حرارت۰ء۳ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں شبانہ درجہ حرارت۱ء۶ڈگری سینٹی گریڈ ریکارڈ ہوا ہے۔
